ASNN – Pasi ka përfunduar ndeshja e kombëtares sonë në Elbasan ndaj Danimarkës, vëmendja e tifozëve lezhjan ka shkuar menjëherë tek Besëlidhja. Ndeshja e radhës me Veleçikun në Lezhë është një sfidë mes kryesueseve të Kategorisë së Parë për Zonën e Veriut. Dhe pse lojtarët kanë qenë pushim për të nisur sot përgatitjet e tyre për ndeshjen ndaj koplikasve, përsëri vëmendja është tek ajo ndeshje duke bërë dhe parashikimet se si do të mund të dalë.
Për gazetat sportive të ditës ka folur mesfushori 28-vjeçar i Besëlidhjes, Orges Lini. “Ne gjatë kësaj jave do të shfrytëzojmë në maksimum ditët e stërvitjes për të qenë në më të mirën e mundshme për ndeshjen ndaj Veleçikut, – ka deklaruar ai. – Ne do të përgatitemi mirë si nga ana taktike, duke bërë dhe analizën e dy ndeshjeve të para, por dhe teknike. Them me bindje se kemi ende shumë punë për të bërë dhe për të korrigjuar disa të meta, të cilat janë shfaqur në fushën e lojës gjatë përballjeve të para.”
“Duhet t’i korrigjojmë ato për të qenë më të saktë në lojën ofensive, – ka vijuar futbollisti i skuadrës lezhjane. – Madje duhet të kemi një lidhje më të mirë mes reparteve, në mënyrë të veçantë mes mbrojtjes e sulmit. Duhet t’i kryejmë lëvizjet më të shpejta dhe të jemi më të saktë në pasimet e topit, si dhe të krijojmë më tepër besim në vetvete se jemi në gjendje për të shkuar dhe në Kategorinë Superiore.”
“Besoj se do ta fitojmë ndeshjen me Veleçikun dhe njëkohësisht do të vazhdojmë të kryesojmë në grupin e Veriut, – pohoi Lini. – Duam të realizojmë objektivin tonë, që nuk është i lehtë për t’u arritur. Ne kërkojmë që t’i fitojmë ndeshjet me një lojë bindëse, sepse vetëm kështu mund t’i gëzojmë tifozët tanë të zjarrtë. Duhet t’u heqim streset atyre me rezultate të mira si në ndeshjet në Lezhë, ashtu dhe në ato që do të luajmë në fushë të huaj.”
“Çdo gjë do t’ia lëmë fushës së lojës, pak fjalë dhe shumë punë për të arritur qëllimin final, që është ngjitja e Besëlidhjes në Kategorinë Superiore”, – ka përfunduar mesfushori 28-vjeçar i Besëlidhjes, Orges Lini.
