ASNN – Pas ndeshjes së Kupës së Shqipërisë me Teutën, atje ku u mundën 0-2, lezhjanët u janë kthyer përgatitjeve për ndeshjen e kampionatit me Adën. “Ajo që duhet theksuar është se nga disa prej lojtarëve prisnim më shumë pavarësisht se luhej përballë një Teutë të fortë, e cila merr pjesë në Kategorinë Superiore”, – ka deklaruar ndihmëstrajneri i Besëlidhjes, Lani, duke i bërë një analizë humbjes me durrsakët në mesjavë.
“Ne bëmë një analizë të kësaj ndeshje dhe në formën e një bashkëbisedimi me futbollistët, kuptohet pa ngritur zërin, vumë në dukje të metat, – ka theksuar ndihmësi i Sinan Bardhit. – Bashkëbiseduam për të vënë pikat mbi “i”, në mënyrë që gabimet ndaj Teutës të mos na përsëriten më në ndeshjet e kampionatit. Ne duhet të riparojmë sa më shpejt repartin e mesit të fushës, e cila duhet ta luajë më shpejt topin për të ndihmuar më pas sulmin.”
“Ekipi duhet ta ndjejë më shumë përgjegjësinë e çdo ndeshje, duhet të vërë shpirtin e garës në funksionim, – ka pohuar ai. – Sepse këto janë gjëra që e kanë dalluar gjithnjë Besëlidhjen. Besoj se një fitore ndaj Adës në Velipojë do të na bënte mirë. Pasi kështu skuadra do të lehtësohej psikologjikisht, sidomos pas humbjes në Kupë ndaj Teutës. Prandaj them që duhet ta harrojmë humbjen me Teutën dhe të mendojmë vetëm për ndeshjen e Adës në Velipojë, e vlefshme për kampionat.”
“Të mendojmë për të fituar këtë takim, më pas dhe të tjerët që sigurisht nuk do të jenë të lehta”, – ka përfunduar ndihmëstrajneri i Besëlidhjes, Lani. Ndërkohë ka nisur stërvitjen me grupin sulmuesi Ruben Danaj, i cili ka qenë i dëmtuar. “Pavarësisht se nuk kam luajtur me ekipin, kjo edhe për shkak të dëmtimit që kam pasur, ndjej përgjegjësinë e çdo rezultati, – ka thënë ai. – Jam pjesë e këtij ekipi dhe u premtoj tifozëve të mi lezhjanë se do të jap maksimumin në çdo ndeshje që do të luaj.”
“Falënderoj trajnerët e mi, mjekët dhe veçanërisht presidentin Ndoka për gjithçka që kanë bërë për mua”, – ka përfunduar sulmuesi i rikthyer lezhjan, Rubens Danaj.
