ASNN – Kategoria e Parë e Kampionatit Kombëtar të Futbollit po luan ndeshjet e javës së 14-të të saj, që është edhe java e fundit për vitin 2018. Si zakonisht, Rrjeti i Radio-Televizionit Shqiptar po sjell dy takimet më të spikatura të grupeve përkatëse dhe të shtunën, pasdreke ka ardhur drejtpërdrejt përballja e Lezhës, midis Besëlidhjes dhe Erzenit të Shijakut. Vendasit kanë kaluar të parët në epërsi që në minutën e 6-të, me anë të Abubakarit.
Me këtë epërsi minimale të lezhjanëve do të mbyllet pjesa e parë, ndërsa në të dytën, i sapofuturi në fushë, Lajthia, do të gjejë golin e barazimit për Erzenin në minutën e 68-të. Kështu, kjo ndeshje mbyllet në barazim 1-1 dhe Erzeni mbetet tanimë plot 7 pikë pas Vllaznisë kryesuese, e cila fitoi 2-0 në Shkodër në derbin me Veleçikun e Koplikut. Takimet e tjera të kësaj jave në grupin e Veriut kanë regjistruar rezultatet Dinamo-Shënkolli 3-0, Burreli-Vora 2-0 dhe Korabi-Iliria e Fushë-Krujës 1-0.
Ndërkaq të shtunën janë luajtur 4 takime të javës së 14-të të grupit B, të cilat kanë regjistruar rezultatet Besa-Oriku 0-0, Tomori-Egnatia e Rrogozhinës1-3, Pogradeci-Turbina e Cërrikut 5-1 dhe Elbasani-Bylis 1-4. Takimi i fundit i kësaj jave në grupin e Jugut luhet të dielën dhe Lushnja pret Apoloninë në përballjen që luhet në Stadiumin “Roza Haxhiu”.
Kjo ndeshje, që do të sillet për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 13:30, është një derbi myzeqar që vë përballë vendasit që mbajnë aktualisht vendin e 5-të, me 20 pikë, 7 më pak sesa Bylisi kryesues, me fierakët që janë 3 shkallë poshtë, në vendin e 7-të, me 4 pikë më pak.
Kategoria e Parë
Java e 14-të
Grupi A
Të shtunën, 22 dhjetor 2018:
Veleçiku Koplik – Vllaznia 0-2
Besëlidhja – Erzeni Shijak 1-1
Dinamo – Shënkolli 3-0
Burreli – Vora 2-0
Korabi – Iliria Fushë-Krujë 1-0
Grupi B
Të shtunën, 22 dhjetor 2018:
Besa Kavajë – Oriku 0-0
Tomori – Egnatia Rrogozhinë 1-3
Pogradeci – Turbina Cërrik 5-1
Elbasani – Bylis 1-4
Të dielën, 23 dhjetor 2018:
Lushnja – Apolonia (13:30)
