ASNN – Federata Shqiptare e Basketbollit ka zhvilluar sot analizën e saj vjetore të 2016-ës dhe, pas saj, edhe drekën tradicionale të fundvitit, ku, sikundër është bërë traditë, ka nderuar edhe më të spikaturit për kontributin e tyre për këtë sport gjatë 365 ditëve që po lëmë pas.
Dhe dy prej tyre janë nga bota e medias. Bëhet fjalë për gazetarin e televizionit informativ shqiptar, “Ora News”, Altin Sulçe, i cili i ka kushtuar një vëmendje të veçantë shumësportëshit në përgjithësi dhe basketbollit në veçanti, në emisionin e tij “Sport Magazin”.
Ndërkohë, me ovacione nga të pranishmit është pritur edhe nderimi për pasqyrimin e veprimtarive të basketbollit në media gjatë vitit 2016 i gazetarit të mirënjohur, “sui generis” në zhanrin e gazetarisë së shumësportëshit shqiptar, Gjergj Vyshka. 41-vjeçari aktualisht është pjesë e stafit të gazetës “Sport Ekspres”.
Vyshka është një nga gazetarët më të palodhur të terrenit, nga të fundit e llojit të tij në botën e sotme të avancimit të teknologjisë së informacionit dhe AlbanianSport.com krenohet që e ka atë bashkëpunëtor të vjetër të saj prej vitesh tashmë, duke kontribuar me afro 30 mijë shkrime mbi çdo sport në Shqipëri në këto 7-8 vitet e fundit.
