Më 30 mars, Federata Shqiptare e Basketbollit do të kryejë zgjedhjet e forumeve të saj, teksa do të votohet për presidentin dhe anëtarët e kryesisë. Ky ka qenë vendimi që Komiteti Drejtues i Federatës Shqiptare të Basketbollit ka marrë më 18 shkurt në Shkodër, gjatë zhvillimit të finaleve të Kupës së Shqipërisë për meshkuj. Një lajm që të habit, edhe sepse më 2012-ën është votuar për presidentin Ponari dhe anëtarët e kryesisë në shtator.
Por dhe një lajm që i ka shokuar të gjithë, sepse askush nuk mund ta çojë ndërmend që në kulmin e sezonit të votohet. Mirëpo, të paktën edhe sipas burimeve zyrtare të Federatës Shqiptare të Basketbollit, i gjithë ky vendim ka një argument kokëfortë. Që do të thotë se pjesëmarrja e Shqipërisë në Eliminatoret e Kampionatit Evropian për të rritur e të rritura, pa harruar këtu dhe moshat, ka një kosto financiare për atë që sot është i pari i Federatës Shqiptare të Basketbollit.
E bëhet fjalë për presidentin Avni Ponari, që më së shumti vetëm në ndeshjen e fundit të Eliminatoreve të Kampionatit Evropian 2017 për të rritura, Shqipëri-Itali, ka paguar koston e akomodimit të gjyqtarëve dhe të ekipit italian. E që basketbolli shqiptar të jetë i përfaqësuar me dy ekipe të rriturish, apo dhe pesë skuadra moshash, shkon në një shumë prej gati 500 milion që kalon kufijtë e buxhetit financiar të Federatës Shqiptare të Basketbollit dhënë nga shteti.
Dhe duke bërë këtë, Ponari është në përfundim e sipër të mandatit të dytë si president, gjithnjë sipas burimeve zyrtare pranë Federatës Shqiptare të Basketbollit, ka pasur dhe fjalë nga prapa. “Atëherë, – thotë kryekzekutivi i koshit shqiptar, Llazani, – meqë jemi në vitin olimpik, që do të thotë dhe vitin zgjedhor, kanë vendosur që zgjedhjet e reja t’i bëjnë më 30 mars. Dhe nuk ka pse të habitet askush, sepse jemi brenda rregulloreve tona.”
