ASNN – Skuadra e Toronto Reptërs në basketbollin elitar amerikan (NBA), korri këtë të premten një fitore të madhe në finale ndaj Miluoki Baks, në kuadër të “play-off”-it në Konferencën e Lindjes, duke bërë një hap të madh drejt finales përfundimtare me Golden Stejt Uorriërs. Siç dihet, Uorriërs mposhtën me rezultatin e përgjithshëm 4-0 Portland Trejlblezërs, duke qenë favorite kryesore për të fituar titullin e NBA-së së këtij edicioni.
Sa i takon Konferencës së Lindjes, kjo ishte ndeshja e 5-të finale mes Reptërs dhe Baks, ku Toronto siguroi fitoren e 3-të he i mjafton një tjetër sukses që të dalë në finale e përgjithshme me Golden Stejt të Konferencës së Perëndimit. Sa i takon ndeshjes, ajo u fitua nga “Reptërs” me shifrat 105-99. Ishte një duel shumë i fortë, ku në fillim dominoi Miluoki Baks, që fitoi 10-minutëshin e parë 32-22, por Toronto reflektoi në çerekun e dytë, duke fituar 24-17 dhe balancoi lojën dhe rezultatin.
Në pjesën e tretë kemi të bëjmë me një barazpeshë totale, në të gjithë treguesit dhe ky çerek loje u mbyll me shifrat e barabarta 26-26. Diferenca erdhi në pjesën e katërt, ku Toronto fitoi thellë 33-24 dhe krejt ndeshjen 105-99. Tashmë rezultati është 3-2 për Toronton, të cilës i duhet dhe një fitore që të sigurojp titullin në Konferencën e Lindjes. Ndeshja e radhës do të luhet të dielën më 26 maj 2019. Por nëse ndodh që të fitojë Miluoki Baks, atëherë do të duhet të luhet një duel i 7-të final ditën e martë, më 28 maj.
Në këto përballje finale në Konferencën e Lindjes ka pasur një rivalitet të spikatur, krejt ndryshe nga Konferenca e Perëndimit, ku “ligjin” e bëri Golden Stejt Uorriërs, që ka një dominim absolut ndaj rivalëve dhe i ka mbyllur hesapet në këtë konferencë, duke pritur fituesin e Lindjes për duelin final për titull në NBA amerikan.
