ASNN – Kombëtarja e basketbollit për meshkuj me trajner të huaj, Avni Ponari prezanton qipriotin, Antonis Kostantinides. Pas futbollit edhe kombëtarja shqiptare e basketbollit do të ketë një trajner të huaj. Pikërisht në ditën e 70-vjetorit të krijimit të saj, Federata Shqiptare e Basketbollit vendosi Antonis Kostantinides si trajnerin e ri të përfaqësueses për meshkuj.

Trajneri qipriot, i cili po drejton me sukses skuadrën e SIGAL Prishtinës u prezantua nga presidenti i Federatës, Avni Ponari. Sipas tij, ky vendim kërkon të ndihmojë më shumë rritjen e basketbollit shqiptar, që ka njohur gjatë vitit të fundit një përfaqësim rekord në arenën ndërkombëtare me 7 ekipe kombëtare të impenjuara në eliminatoret e turneve të ndryshme.

Presidenti i Federatës së Basketbollit theksoi se trajneri i ri dhe kombëtarja e meshkujve do të ketë të gjithë mbështetjen e duhur, ndërsa po punohet edhe për natyralizimin dhe përfshirjen në përfaqësuesen e meshkujve edhe dy basketbollistë amerikanë. Nga ana tjetër, Antonis Kostantinides u shpreh entuziast për detyrën e re. Drejtimi i një skuadre kombëtare nuk është një risi për trajnerin qipriot që e ka bërë një gjë të tillë me ekipin e vendit të tij.

“Unë kam drejtuar edhe më parë ekipet kombëtare në të tilla turne dhe e di vështirësinë e këtyre takimeve, – ka thënë ai gjatë konferencës së sotme për shtyp. – Për më tepër që rivalët janë të fortë dhe me përvojë në arenën ndërkombëtare. Por nëse punojmë së bashku si duhet, mund të arrijmë rezultate të mira.” Në fakt, Antonis Kostantinides ka nisur prej javësh punën, duke ndjekur disa prej ndeshjeve të kampionatit shqiptar të basketbollit, si dhe ka kontaktuar me lojtarët shqiptarë që luajnë në Evropë, duke marrë edhe gatishmërinë e tyre.

Kombëtarja shqiptare e basketbollit për meshkuj do të jetë e impenjuar në Eliminatoret e Kampionatit Evropian të vitit 2017. Ajo luan në grupin F, bashkë me Gjeorgjinë, Sllovakinë dhe Malin e Zi. Ndeshjet nisin më 31 gusht 2016 dhe përfundojnë më 17 shtator 2016.