ASNN – Nëpërmjet një njoftimi të shpërndarë për mediat të hënën, Kryesia e Federatës Shqiptare të Basketbollit ka bërë të ditur se ka zhvilluar një mbledhje për të vendosur praktikisht piketat e sezonit të ri sportiv 2018-2019, që nis muajin e ardhshëm, ndërsa më 28 shtator hidhet shorti i kampionatit. Takimi ka patur si qëllim zbardhjen e skuadrave që do të luajnë në kampionat, se cilat prej tyre kanë plotësuar kriteret e vendosura nga FSHB, kryesisht ato financiare.
Struktura e sezonit të ri nuk do të ndryshojë, në të dyja kategoritë, meshkuj e femra. Ekipet e meshkujve do të luajnë sërish në Superligë (6 skuadrat më të mira) dhe Kategorinë e Parë (skuadrat e tjera), ndërsa femrat janë në dy Grupe, A dhe B. Në Grupin A do të luajnë 6 ekipet më të mira dhe në Grupin B skuadrat e tjera. Te femrat problem është një vend bosh në Grupin A, që është krijuar pas tërheqjes nga kampionati i ekipit të Goga Basket, ashtu sikurse pat paralajmëruar pak muaj më parë pas polemikave që pati me FSHB-në për gjykimin e njëanshëm.
Federata sqaron se për atë vend bosh do të zhvillojë një tur paraeliminator, duke i ftuar të gjitha ekipet e Grupit B të marrin pjesë. Ky tur do të zhvillohet në bazë të një skeme që u jep mundësi të gjitha ekipeve të regjistruara në Grupin B të marrin pjesë dhe të tentojnë të luajnë në Grupin A sezonin e ri. Problem është pjesëmarrja në kampionat e skuadrës së Tirana Eagles Basket, që sipas FSHB-së ka një detyrim financiar me vlerën 545 mijë lekësh, ende i pashlyer që nga sezoni i kaluar.
Kjo shumë e prapambetur duhet të paguhet deri më datën 27 shtator, në të kundërt ekipi nuk do të futet në short një ditë më pas. Për shkak të këtij detyrimi, skuadra e Tirana Eagles Basket nuk u lejua të luajë disa ndeshje të sezonit të kaluar, duke nisur një konflikt me FSHB-në dhe i humbi ndeshjet aforfe 20-0. Ja edhe ndarjet e skuadrave në kategoritë përkatëse të Kampionatit Kombëtar në Basketboll për Meshkuj dhe për Femra.
Superliga Meshkuj: Tirana, Teuta, Partizani, Kamza Basket, Vllaznia dhe Goga Basket.
Kategoria e Parë Meshkuj: Apolonia, Flamurtari, Skënderbeu, Elbasani dhe Tirana Eagles Basket*.
*Tirana Eagles Basket do të luajë vetëm nëse përmbush detyrimet e vjetra të pashlyera.
Femra – Grupi A: Flamurtari, Shoqata “Klubi i Basketbollit Tirana Femra”, Studenti, Vllaznia dhe Elbasani.
Femra – Grupi B: Skënderbeu, Partizani, Apolonia, Kamza Basket, Teuta dhe Shoqata Tirana Basketboll Femra.
