ASNN – Me takimin e dytë brenda 3 ditësh ndaj Luksemburgut, që ishte i vlefshëm për renditjen nga vendi i 21-të deri në të 24-tin, Kombëtarja shqiptare e Nën-18-vjeçarëve ka ulur siparin e pjesëmarrjes së saj në Divizionin B të Kampionatit Evropian të Basketbollit për këtë grupmoshë të meshkujve, që i zhvilloi takimet e tij në Austri.

Dhe ashtu sikundër kishte bërë edhe në duelin e 30 korrikut, të vlefshëm për renditjen nga vendi i 17-të deri në të 24-tin, edhe sot Kombëtarja e udhëhequr nga i mirënjohuri i koshit shqiptar, Afrim Bilali, që debutoi si trajner i një ekipi përfaqësues, ka arritur të triumfojë ndaj luksemburgasve, me shifrat 64-60.

Kombëtarja kuqezi i ka fituar 3 nga 4 fraksionet e lojës, ndonëse duhet theksuar se, ndryshe nga ndeshja e para 3 ditëve, kur Shqipëria fitoi lehtësisht 62-37, këtë radhë, përfaqësuesja e Principatës luajti më fort, më e disiplinuar dhe nuk lejoi shumë hapësira basketbollistëve kuqezinj.

Pjesën e parë, që do të hidhte edhe themelet e fitores, skuadra e Bilalit e fitoi me 4 pikë epërsi, 18-14, por atë të dytën do ta marrin luksemburgasit 17-14. Kjo bën që Shqipëria të shkojë në dhomat e zhveshjeve me një epërsi minimale prej një pike të vetme, 32-31. Pas pushimit, kuqezinjtë kthehen në parket dhe e marrin 10-minutëshin e tretë 21-19.

Në fakt, kjo ka qenë pjesa më rezultateve e takimit, pasi ajo e katërta dhe e fundit, ishte një betejë taktike dhe nervash, të cilën sidoqoftë e fitoi Shqipëria 11-10 dhe gjithë ndeshjen 64-60. Lilaj, me 20 pikë të realizuara dhe 14 topa të fituara në tabelë, dhe Taflaj, me 14 pikë dhe 7 topa të fituar në tabelë, ishin më të spikaturit për kuqezinjtë.

Kështu, Shqipëria merr vendin e 23-të midis 24 skuadrave pjesëmarrëse në këtë divizion, duke lënë prapa pikërisht Luksemburgun, por ajo që duhet theksuar është se loja e kuqezinjve të Bilalit ka ardhur gjithnjë e në rritje dhe përvoja e fituar në këtë turne do t’u vlejë mjaft djemve dhe stafit teknik.

Ja të gjitha ndeshjet e Kombëtares së Nën-18-vjeçarëve

Grupi A                      Kombëtarja               Rivalët            Data                Rezultati

Ndeshja 1                  Shqipëri         –           Zvicër             23 korrik         50-71

Ndeshja 2                  Shqipëri         –           Angli               24 korrik         49-70

Ndeshja 3                  Shqipëri         –           Poloni                        25 korrik         51-98

Ndeshja 4                  Shqipëri         –           Estoni             26 korrik         49-87

Ndeshja 5                  Shqipëri         –           Bullgari          27 korrik         47-62

Vendet 17-24            Shqipëri         –           Bjellorusi       29 korrik         69-81

Vendet 17-24            Shqipëri         –           Luksemburg  30 korrik         62-37

Vendet 21-24            Shqipëri         –           Maqedoni      1 gusht           71-74

Vendet 21-24            Shqipëri         –           Luksemburg  2 gusht           60-64