Shqipëria e basketbollit për Nën-16-vjeçarët për djem, pjesëmarrëse në Divizionin C të Kampionatit Evropian të kësaj grupmoshe, që është duke u zhvilluar në Andorra La Vela, e ka humbur dhe ndeshjen e dytë. Këtë herë kuqezinjve, të drejtuar nga Erkand Karaj dhe Gledis Muhametaj, u ka hasur “sharra në gozhdë” me Azerbajxhanin. Madje shtohet rëndesa e humbjes, sepse azerbajxhanasit kanë luajtur me vetëm 6 lojtarë.

Tek pesë titullarët Akbarov, Kirtadze dhe Nodia, të cilët kanë shënuar së bashku treçerekun e pikëve të Azerbajxhanit, 68 nga 78 në total, kanë luajtur 40 minuta. Dhe sakaq gjysma e ekipit të Azerbajxhanit ka qëndruar pushim, që do të thotë se na ka mundur fare “serbes” dhe pa pikë problemi.

Vetëm Ergys Muhametaj me 27 pikë të shënuara, që vazhdon të jetë lojtari më i mirë i kësaj kombëtareje, është fare pak. Të mos dish ta detyrosh kundërshtarin që luan me të njëjtën pesëshe të bëjë gabime personale kjo është amatore, që do të thotë se është kombëtare që ka probleme për nga niveli.

Madje po të shohësh nga faullet, Azerbajxhani ka një më tepër sesa kuqezinjtë, 18 me 17, por ama askush nuk ka dalë nga fusha e lojës me 5 gabime personale. Kurse tek tanët e ka pësuar Skendaj, që ishte dhe shënuesi i dytë më i mirë i kuqezinjve në këtë ndeshje me 12 pikë.

Jo më kot që në fazën përzgjedhëse, Karaj e pati vënë theksin tek fakti se kjo është një kombëtare, e cila nuk është aty ku duhet për nga niveli i elementëve dhe lojës. Ndaj dy humbje në dy ndeshje të luajtura do të thotë që gjërat nuk janë pozitive për kuqezinjtë e kësaj moshe.