Një delegacion i Federatës Shqiptare të Basketbollit, me në krye Sekretarin e Përgjithshëm, Korab Llazani, i cili ka qenë i shoqëruar nga kryetari i Shoqatës së Gjyqtarëve, “bilbili” ndërkombëtar Gentian Cici, por dhe vëzhguesi Arben Kasmi, ka qenë dje për një vizitë pune në Kosovë. Llazani është pritur nga homologu i tij Leart Hoxha dhe zyrtarë të tjerë të Federatës së Basketbollit të Kosovës. Në këtë takim është diskutuar për bashkërendimin e veprimtarive të përbashkëta gjatë verës duke filluar nga zhvillimi i ndeshjeve miqësore për përfaqësueset e kategorive të moshave dhe të të rriturve në të dyja gjinitë.
Madje është diskutuar deri tek mundësia e organizimit të seminareve të përbashkëta për gjyqtarë e trajnerë, si dhe veprimtari të tjera garuese dhe teknike. “Në takim kemi rënë dakord për miqësoret për të gjitha kategoritë e Përfaqësueseve dhe për të dyja gjinitë, – ka deklaruar pas takimit Sekretari i Përgjithshëm i FBK-së, Leart Hoxha. – Ato do të bëhen publike në ditët e ardhshme, por me Përfaqësueset e të rriturve do të luajmë së paku një herë në datat e hapura në muajin gusht. Po ashtu kemi rënë dakord për organizimin e seminareve të gjyqtarëve e trajnerëve, si dhe për fillimin e një programi të të dyja shteteve për licencim të trajnerëve.
“Për këtë do të kërkohet mbështetje materiale dhe teknike nga FIBA, por edhe nga federatat mike”, – ka shtuar nr. 2 i organizmit që qeveris koshin e Kosovës. Duhet theksuar se Kosova dhe Shqipëria do të bëjnë ndeshje në të njëjtin grup me përfaqësueset e Nën-20-vjeçarëve në Kampionatin Evropian, Divizioni B që do të zhvillohet prej nga data 15, deri më 24 korrik 2016. në Halkidhiqi të Greqisë. Në Grupin C, përveç Kosovës dhe Shqipërisë do të jenë edhe Greqia vendëse, Britania e Madhe, Holanda dhe Irlanda.
