ASNN – Të shtunën janë luajtur edhe dy ndeshjet e tjera të javës së 7-të të nivelit më të lartë të Kampionatit Kombëtar të Basketbollit për Meshkuj, që njihet si Superliga, dhe Vllaznia e Tirana i kanë bërë mirë “detyrat e shtëpisë”, duke korrur fitore në fushën e tyre.

Kështu, shkodranët e trajnerit Bledar Gjeçaj kanë mposhtur me 31 pikë epërsi, 93-62, skuadrën e Flamurtarit dhe ruajnë kreun e renditjes me 14 pikë, një më tepër sesa Tirana, e cila ka triumfuar gjithashtu në mënyrë bindëse në derbin e kryeqytetit me Partizanin, të cilin e mundi 86-62.

Superliga e ka luajtur të premten ndeshjen e parë të javës së saj të 7-të dhe Apolonia është shpartalluar në Sallën Sportive të Bathores nga Kamza Basket, me rezultatin e thellë, 52-119. Një fitore kjo me 67 pikë diferencë dhe Kamza Basket e ka tronditur kështu Apoloninë, në një ndeshje ku shenjat kanë qenë të qarta që nga fillimi.

Kjo pasi skuadra e trajnerit Adem Muhametaj e ka fituar pjesën e parë me epërsinë 36-14. Në pjesën e dytë, ku fierakët kanë shënuar sërish vetëm 14 pikë, kamzalinjtë mjaftohen me 25 dhe shkojnë në pushimin e madh në epërsi të padiskutueshme, 61-28. Edhe dy 10-minutëshat e fundit kanë qenë pak a shumë e njëjta histori.

Kamza Basket i fiton ato përkatësisht 33-14 dhe 25-10 dhe gjithë ndeshjen me rezultatin e thellë 119-52.

Kampionati Kombëtar

i Basketbollit – Meshkuj

Superliga

Java e 7-të

(21-22 nëntor 2014)

Kamza Basket – Apolonia 119-52

Vllaznia – Flamurtari            93-62

Tirana – Partizani                 86-62

Renditja

Nr.       Skuadra                     N.        F.         H.        Psh-Pp           Pikë

1. Vllaznia 7          7          0          604-440         14
2. Tirana 7          6          1          606-457         13
3. Partizani 7          4          3          448-454         11
4. Kamza Basket 7          3          4          508-430         10
5. Flamurtari 7          1          6          454-570         8
6. Apolonia 7          0          7          372-641         7