ASNN – Teuta ka pësuar një tjetër humbje të enjten në mbrëmje në kuadër të Ligës Ballkanike, sepse u mund në Bullgari nga skuadra e Akademik Bulteks 99-ës, me rezultatin 73-89. Ishte humbja e 3-të radhazi në 6 ndeshje të luajtura. Nëse në 3 ndeshjet e para Teuta cilësohej një skuadër pretendente, që pati një ecuri mjaft të mirë, këtë herë ekipi ka probleme, dukshëm probleme që shfaqen në forma nga më të ndryshmet.
Përballë bullgarëve të Akademik Bulteksit, Teuta mundi të fitonte vetëm një pjesë loje, kurse tri pjesët e tjera i fituan shtatlartët bullgarë. Kështu, 10-minutëshi i parë përfundoi me shifrat 19-25 në favor të “Djemve të detit” të Shqipërisë. Ishte një pjesë loje premtuese për Teutën që dha shenja “ringjalljeje”. Por jo, ishin shenja të gënjeshtërta, pasi Akademik Bulteksi e përmbysi gjithçka në 10-minutëshin e dytë, të cilin e fitoi bindshëm 19-10.
Kur ishte mbyllur gjysma e parë e ndeshjes, rezultati regjistronte shifrat 38-35 në favor të Akademik Bulteksit. Natyrisht, nuk ishte një diferencë e madhe, por, në gjysmën e dytë, bullgarët morën frenat e lojës në dorë dhe nisën sulme frontale për të mos i lënë asgjë rastësisë. 10-minutëshi i tretë përfundoi me shifrat 20-15 dhe 10-minutëshi i katërt dhe i fundit me shifrat 31-23. Që të dy pjesët ishin pra në favor të basketbollistëve vendas.
Si përfundim, Akademik Bulteks fitoi me rezultatin 89-73, pra me 16 pikë diferencë në favor të vendasve, të cilët morën dy pikë, kurse Teuta mbeti në vend të tretë me 9 pikë.
Liga Ballkanike 2018-2019
Basketboll – Meshkuj
Akademik Bulteks 99 – Teuta 89-73
(19-25, 19-10, 20-15, 31-23)
Renditja:
Nr. Skuadra N F H Pike
- BC Academic Bultex 99 7 4 3 11
- BC Beroe 5 5 0 10
- KS Teuta 6 3 3 9
- KK Blokotehna-NB 3 3 0 6
- KK Kozhuv 5 1 4 6
- KB Bashkimi 5 1 4 6
- Barsi Atyrau 3 0 3 3
- KB Z Mobile Prishtina 0 0 0 0
