ASNN – Teuta ka pësuar humbjen e parë në 4 ndeshje të luajtura në Ligën Ballkanike në basketboll për meshkuj. Në Pallatin e Sportit “Ramazan Njala” në Durrës, Teuta priti Blokotekhnën e Maqedonisë, e cila i shkaktoi skuadrës durrsake një disfatë të papritur me rezultatin 61-70. Ishte një ndeshje e barazpeshuar në tri pjesët e para të saj, por miqtë bënë diferencën në 10-minutëshin e fundit, një diferencë që u dha fitoren.
Për durrsakët ishte disfata e parë në këtë veprimtari dhe tanimë ata zbresin në vend të 3-të me 7 pikë, ndërkohë që në 4 ndeshje të luajtura vendin e parë e mban Beroe me 8 pikë. Sa i takon ndeshjes së të martës, Teuta e nisi mjaft mirë atë, duke fituar 10-minutëshin e parë 15-12. Edhe pse humbi 10-minutëshin e dytë me shifrat 15-16, Teuta e mbylli gjysmën e lojës në epërsi të dy pikëve (30-28).
Miqtë nga Maqedonia bënë diferencën në dy pjesët e tjera. Konkretisht, në 10-minutëshin e tretë ata fituan 17-13, ndërsa kulmin e diferencës e arritën në 10-minutëshin e katërt dhe të fundit me shifrat 25-18 dhe krejt ndeshjen me rezultatin 70-61. Sidiqoftë, edhe pse pësoi humbjen e parë në këtë veprimtari, Teuta mund të përmirësojë rezultatet e saj në ndeshjet e ardhshme, ndërkohë që favoritja, Prishtina, nuk e ka nisur ende garën.
Liga Ballkanike (BIBL)
Basketbollit – Meshkuj
Teuta – Blokotekhna 61-70
(15-12, 15-16, 13-17, 18-25)
Renditja
Nr. Skuadra N. F. H. Pikë
- BC Beroe 4 4 0 8
- Akademik Bulteks 5 2 3 7
- Teuta 4 3 1 7
- KK Kozhuv 4 1 3 5
- KB Bashkimi Prizren 4 1 3 5
- KK Blokotehna-NB 2 2 0 4
- BC Barsi Atirau 3 0 3 3
- KB Z Mobile Prishtina 0 0 0 0
