ASNN – Është luajtur dje ndeshja e fundit e javës së dytë të nivelit më të lartë të Kampionatit Kombëtar të Basketbollit për Meshkuj, që njihet si Superliga dhe ka ardhur fitorja e parë në kampionat për ekipin e Teutës në basketboll për meshkuj. Në takimin e zhvilluar në Pallatin e Sportit “Ramazan Njala”, durrsakët kanë mundur Flamurtarin, me shifrat 80-63.

Pas humbjes një javë më parë përballë bardhebluve të Tiranës, skuadra durrsake pati epërsi dj dhe triumfoi përpara publikut të saj. Ndeshja u dominua nga basketbollistët durrsakë, të cilët i fituan të katërta pjesë, duke e thelluar epërsinë gjatë gjithë kohës. Flamurtari përpiqet të rivalizojë, por s’ka forcë të përmbysë shifrat dhe në fund detyrohet të pranojë humbjen në shifrat 63-80.

Më i miri në fushe ishte Aliaj i Teutës, me 21 pikë, mbështetur nga Llazani e Gorea me nga 19 pikë secili. Ndërkaq, Superliga i ka luajtur të premten dy ndeshjet e para të javës së saj të dytë, duke përvijuar Vllazninë dhe Kamza Basketit si dy rivale të hershme në betejën për titullin “kampion”.

Shkodranët, kampionë në fuqi, nuk kanë patur shumë probleme në kryeqytet, duke triumfuar 70-59 ndaj Partizanit vendas, në një ndeshje ku kuqeblutë janë mjaftuar të bëjnë detyrën, duke administruar fitoren përballë të kuqve me dëshirë për të bërë diçka, por ka kapacitetin e duhur për ta arritur këtë.

Ndërkohë, Kamza Basket ka lënë pas atë humbje të javës së parë në Shkodër përballë Vllaznisë, duke fituar, madje bindshëm, në derbin me Tiranën, me 23 pikë epërsi, 88-65, në atë që ishte një “shfaqje force” për skuadrën e trajnerit Adem Muhametaj. Kjo ndeshje u zhvillua në Sallën Sportive të Bathores.

Teuta – Flamurtari                80-63

(19-12, 19-18, 25-19, 17-14)

Teuta: Gorea, Llazani, Ndreko, Aliaj, Skilja, Thano, Isufi, Pasha, Isaku, Berberi, Mirdita.

Trajner: Xh. Kalaja

Flamurtari: Kaso, Mino, Kollori, Toska, Sotiri, Beko, Dede, Bino, Nuredini, Gani, Sinanaj.

Trajner: V. Birçaj

Gjyqtarë: G. Cici, E. Koçi, H. Trajer

Kampionati Kombëtar

i Basketbollit – Meshkuj

Superliga

Java e dytë

(9-10 tetor 2015)

Të premten:

Partizani – Vllaznia             59-70

Kamza Basket – Tirana       88-65

Të shtunën:

Teuta – Flamurtari               80-63

Renditja

Nr.       Skuadra                     N.        F.         H.        Psh-Pp           Pikë

1. Vllaznia             2          2          0          140-119         4
2. Kamza Basket 2          1          1          148-135         3
3. Teuta                         2          1          1          154-143         3
4. Tirana 2          1          1          145-162         3
5. Flamurtari             2          1          1          142-147         3
6. Partizani             2          0          2          126-149         2