ASNN – Teuta ka debutuar me një fitore dramatike në shtesë në Ligën Ballkanike të Basketbollit për Meshkuj (BIBL), duke mundur ekipin bullgar të BC Akademit Bulteks 99 me rezultatin 89-86 pas plot 35 minutash lojë, në takimin e zhvilluar në Pallatin e Sportit “Ramazan Njala” të Durrësit.

Në fakt, ka qenë një “ruletë ruse” e vërtetë kjo sfidë e parë e durrsakëve të drejtuar nga trajneri boshnjak Boban Niniç, pasi janë bullgarët që e nisin më mirë 10-minutëshin e parë, duke kryesuar që në fillim dhe duke e fituar atë 22-18. Por Teuta është kundërpërgjigjur në pjesën e dytë, duke e fituar atë 19-16.

Sidoqoftë, janë miqtë ata që shkojnë në pushimin e madh duke kryesuar, edhe pse me një pikë të vetme, 38-37. Ringjallja e Teutës në 10-minutëshin e dytë ka vijuar edhe në atë 3-tin, të cilin skuadra durrsake e fiton me 6 pikë epërsi, 21-15, duke marrë kështu kryesimin e ndeshjes me shifrat 58-53.

Ndonëse Teuta e ka thelluar deri në 13 pikë këtë epërsi, BC Akademik Bulteksi 99 ka reaguar gradualisht, duke marrë madje edhe kryesimin në minutat e fundit. Por Teuta nuk është dorëzuar dhe në atë gjysmë minute nervoze për të dyja palët ka patur shumë gabime dhe dramacitet.

Do të jetë Robert Shestani ai që do të shënojë dy pikë të vyera në sekondën e fundit të ndeshjes, duke e çuar gjithçka në barazpeshë, 75-75, përtej protestave të bullgarëve se ky kosh ishte shënuar përtej limiteve të kohës së rregullt. Por gjyqtarët nga Kosova dhe tavolina nuk kanë menduar kështu dhe gjithçka u drejtohet 5 minutave shtesë.

Edhe këto minuta ishin si e gjithë ndeshja, me Teutën që e nis më mirë, por me bullgarët që reagojnë. Sidoqoftë, skuadra e trajnerit Boban Niniç e fiton këtë pjesë shtesë 14-11 dhe, bashkë me të edhe gjithë takimin 89-6, duke ndarë tashmë kreun e renditjes me Beroe Stara Zagorën, me nga dy pikë secila.

Teuta 89-86 BC Akademik Bultex 99

KS Teuta                               18        19        37        21        17        38        14

BC Akademik Bultex 99      22        16        38        15        22        37        11

Gjyqtarë: Daut Mehmeti  Dardan Maxhuni  Elldin Uglari

Renditja

Nr.       Skuadra                                 N.        F.         H.        Psh-Pp           Pikë

1        BC Beroe                               1          1          0          107-77            2

2        KS Teuta                               1          1          0            89-86            2

3        BC Akademik Bultex 99      1          0          1            86-89            1

4        KB Bashkimi                         1          0          1            77-107          1