Për herë të fundit kishte mundur më 2008-ën në Pallatin e Sportit “Asllan Rusi” në kryeqytet Qipron 69-63, si dhe Zvicrën më 2009-ën në Korçë, 76-73. E tanimë është rikthyer tek suksesi me Sllovakinë, 72-65, me të cilën ndan vendin e 3-të dhe të 4-ët në grup. Duket sikur nuk ndihet Broudus, ndërsa bën një shpërndarje të shpejtë të topit për Shestanin, Hysenagollin, Shimën e Taflajn. E këta nuk falin.
18-6 është shkëputur kombëtarja jonë, ndërsa Sllovakia afrohet në 18-13. Mirëpo trepikëshat radhazi dhe sërish kuqezinjtë janë në epërsi, me 11 pikë diferencë, 24-13. E deri në fund e kemi mbajtur nën kontroll ndeshjen dhe 29-17 pjesa e parë. Një epërsi që mund dhe të ishte thelluar. Sllovakët reagojnë dhe kanë fituar pjesën e dytë 10-14 e ngushtojnë në 39-31.
Fillimi i pjesës së tretë e ka shkëputur Shqipërinë në 44-35. Luhet pikë më pikë, por pjesa e tretë është për kuqezinjtë 19-18, që kryesojnë në shifrat 58-49. Ka emocione në pjesën e katërt, sepse Sllovakia është afruar deri në 5 pikë. Ka edhe nerva aq sa Shima është ndëshkuar me gabim teknik. Sllovakia e fiton pjesën e katërt 14-16, por fitorja prapëseprapë i ka buzëqeshur Shqipërisë me rezultatin e përgjithshëm 72-65.
Kënaqësi tek presidenti i Federatës Shqiptare të Basketbollit, Avni Ponari, Sekretari i Përgjithshëm Korab Llazani, por dhe i gjithë komuniteti i basketbollit. Aq sa dhe skeptikët e kanë pasur të vështirë të thonë qoftë dhe një fjalë të vetme të keqe. Festë në dhomat e zhveshjes dhe Shqipëria premtojn të jetë e madhe edhe në basketbollin e meshkujve.
Shqipëri – Sllovaki 72-65
(29-17, 10-14, 19-18, 14-16)
Shqipëria: Taflaj (5), Hysenagolli (15), Shima (6), Shestani (13), Broadus (17)/Vogli (9), Gjonaj (2), Dusha, Topalli (3), Deda (2). Trajner: A. Kostantinides
Sllovakia: Jas (2), Bilik, Milosheviç (18), Korner (7), Batka (16) / Hlivak, Krajçoviç (13), Baldovski (2), Bashan, Bojanovski (9). Trajner: I. Rudez
Gjyqtarë: S. Petek (Slloveni), Z. Mitrovski (Maqedoni), T. Benczur (Hungari)
