ASNN – Skuadra e kryeqytetit në basketboll për meshkuj, Invejdërs dhe TEB (Tirana Eagle Basket), kanë siguruar fitore domethënëse të mërkurën në kuadër të turit paraeliminator të Kupës së Shqipërisë. Invejdërs fitoi ndaj Apolonisë 91-66, në një takim të dominuar tërësisht, të zhvilluar në Pallatin e Sportit “Asllan Rusi” në Tiranë.
Skuadra tjetër kryeqytetase, TEB, mposhti Skënderbeun me rezultatin 82-43, duke mos e vënë në diskutim asnjë moment fitoren dhe kalimin në çerekfinale të Kupës së Shqipërisë. Duhet thënë se Skënderbeu dhe Apolonia ishin kualifikuar më herët respektivisht ndaj Elbasanit dhe Flamurtarit.
Si përfundim, me ndeshjet e së mërkurës plotësohen edhe çiftet çerekfinale, ku ndeshjet e këtij turi do të luhen më 24 janar 2018. Dhe, më konkretisht, në çerekfinale do të përballen çiftet Goga Basket-Invejdës (17:00), Tirana-Kamza (17:00), Teuta-Vllaznia (18:00) si dhe Partizani-Tirana Eagles Basket (18:00).
Të gjitha këto takime do të luhen të enjten më 24 janar.
