ASNN – Në këtë sezon në Ligën Ballkanike të Basketbollit për Meshkuj (BIBL) do të garojnë vetëm nëntë skuadra. BIBL-ja nuk ka arritur që të gjejë një ekip që do të mund ta zëvendësonte ekipin e përjashtuar malazez, Sutjeska, për shkak të mos kryerjes së obligimeve financiare.

Tani dy grupet A dhe B do të kenë përkatësisht 4 dhe 5 ekipe, ka njoftuar “Liga Ballkanike”, përmes faqes së saj zyrtare në Internet. Për rrjedhojë, sipas kësaj faqeje, me ndërrimin e numrit të skuadrave pjesëmarrëse, ndryshon edhe sistemi i garave në këtë veprimtari.

Nga 10 skuadra që kanë qenë të ndara në grupin A dhe B, me nga 5 skuadra, 4 skuadra kalonin në fazën tjetër. Kurse tani tri skuadrat e para të secilit grup do të kualifikohen direkt në fazën tjetër, kurse skuadra e katërt e grupit A dhe skuadrat që janë në vendet 4 dhe 5 të grupit B, do të luajnë ndeshje shtesë për të siguruar kualifikimin.

Nga tri skuadrat e mbetura, që do të ndeshen në një miniturne në fushë asnjanëse nga data 26, deri më 28 janar të vitit të ardhshëm, dy kualifikohen dhe një eliminohet. Në Ligën Ballkanike në këtë sezon do të luajnë tri skuadra kosovare, e më konkretisht SIGAL Prishtina, KB Peja dhe Bashkimi.

Skuadrat shqiptare duket se do të mungojnë në këtë veprimtari, kryesisht për pamundësi financiare. Kampione në fuqi e kësaj veprimtarie rajonale është SIGAL Prishtina.