ASNN – Pas fitores së Teutës në Ligën Ballkanike përballë skuadrës nga Kosova, Bashkimit të Prizrenit, foli dhe lojtari me përvojë i skuadrës durrsake, Gent Lasku. Ai ka ardhur pikërisht në këtë periudhë në radhët e ekipit durrsak dhe e komentoi me ngjyra ndezëse ndeshjen dhe rezultatin, por siguroi se ky ekip mund të bënte edhe më shumë në ditët dhe javët në vazhdim.

“Arritëm një fitore shumë të rëndësishme, – shprehet Lasku për mediat. – Ishim superiorë dhe kjo u vu re qartë. Mendoj që diferencën e bënë kualitetet tona, stoli dhe përgatitja fizike. Kundërshtarit i ra rendimenti shumë për shkak të minutazhit të gjatë të disa prej lojtarëve të tyre në fushën e lojës.”

“Sidoqoftë, ne nuk duhet të kalojmë në eufori, sepse ekipet në Ligën Ballkanike kanë karakter dhe cilësi të padiskutueshme, – ka vijuar ish-basketbollisti i Tiranës dhe ekipit kombëtar. – Kemi objektiv që në këtë ligë të kalojmë minimalisht grupin. Më pas të shohim, pasi oreksi vjen duke ngrënë”.