Të besuarit e trajnerit Eduard Çarçani kanë bërë përmbysjen e madhe në pjesën e katërt, ndërsa për Flamurtarin nuk kanë vlejtur 32 pikët e Klevis Kasos, që ka realizuar gjysmën e totalit të labëve. Një 3-pikësh i Toskës i jep epërsinë Flamurtari 3-0. Por Superiori kthen shpejt dhe është shkëputur në kryesim 9-3. Luhet pikë më pikë dhe, ndonëse Kaso e mban gjithnjë përpara ekipin, pjesa e parë është mbyllur 15-11 për Superiorin.

Flamurtari ka treguar dhe më shumë përvojë e pjekuri, gjë që ia jep dhe të luajturit për shumë kohë në elitën e basketbollit shqiptar. Ndaj dhe ka fituar pjesën e dytë 17-21 dhe në pushim është barazim 32-32. Që do të thotë se gjithçka duhet të nisë nga e para. Por për Superiorin në mënyrë të habitshme, është mbyllur koshi, që është hapur në krahun tjetër për vlonjatët. Klevis Kaso nuk përmbahet dhe shënon në të gjitha drejtimet.

Madje teksa ka kërkuar një dypikësh të rregullt ka pasur dhe një gabim teknik për stolin e Superiorit për protesta. Flamurtari arrin të shkëputet në 50-60 në fillimin e pjesës së katërt. 54-62 dhe këtu nis tatëpjeta e vlonjatëve. Qilimi, Gjeçi, Beqo, Pregja dhe Troja nuk gabojnë më, sepse e fortë ka qenë edhe shkundja e trajnerit Eduard Çarçani. Dhe me shifra të pabesueshme, 20-6, në pjesën e katërt, Superiori ka përmbysur gjithçka në 70-63.

Aq sa dhe vlonjatët janë dorëzuar dhe sekondat e fundit i kanë shfrytëzuar për t’i dhënë dorën kundërshtarit, ndërsa kanë pranuar humbjen. Kësisoj shkohet në një ndeshje të tretë mes skuadrave më shumë se rivale me njëra-tjetrën.

Superiori – Flamurtari          70-63  (1-1)

(15-11, 17-21, 18-25, 20-6)

Superiori: Pregja (18), Beqo (7), Troja (13), Nikolli (7), Qeleshi (7) / Qilimi (10), Gjeçi (4), Jareci, Shushku (4). Trajner: E. Çarçani

Flamurtari: Dede (1), Sotiri (11), Toska (8), Kaso (32), Beko (11) / Gani, Mino. Trajner: V. Birçaj

Gjyqtarë: A. Dulçe, G. Hoxha (Tiranë), H. Trajer (Shkodër)

Kampionati Kombëtar

i Basketbollit – Meshkuj

Kalendari i “Play-out”

midis Superligës dhe

Kategorisë së Parë

11 maj 2016:

Flamurtari – Superior Klima                        72-64  (1-0)

(23-8, 22-17, 19-22, 8-17)

Pallati i Sportit “Flamurtari”, Vlorë

14 maj 2016:

Superiori – Flamurtari                      70-63  (1-1)

(15-11, 17-21, 18-25, 20-6)

Pallati i Sportit “Asllan Rusi”, Tiranë

18 maj 2016:

(nëse do të jetë e nevojshme)

Flamurtari – Superiori                     ora 17:00

Pallati i Sportit “Flamurtari”, Vlorë