ASNN – Flamurtari e ka fituar ndeshjen e parë të sezonit në basketboll për meshkuj, teksa përballë ka pasur Partizani në një ndeshje me shumë emocione. Në dhjetë minutat e parë gjithçka ka qenë e barabartë, ku herë Flamurtari e herë Partizani kanë dalë në epërsi.

Por në përfundim është mbyllur në rezultatin e barabartë, 19-19. E njëjta situatë ka vijuar edhe në pjesën e dytë deri në dy minuta nga fundi i saj, atëherë kur Flamurtari tregohet më i qartë në lojën e tij duke arritur të shkëputet dhe mbyllur 10 minutat e dyta në epërsi, 39-33.

Edhe pas pushimit vijon loja më e mirë për Flamurtarin, por edhe miqtë kërkojnë të mbeten në lojë duke ngushtuar rezultatin. Por vetëm deri në katër pikë 50-46, ndërsa vlonjatët e mbyllin edhe këtë pjesë në epërsi sërish me rezultatin 58-50. Në pjesën e fundit, Flamurtari e sheh fitoren më afër dhe, pavarësisht daljes me 5 gabime të Kollovit, luan mirë dhe administron gjithçka për ta mbyllur krejt ndeshjen në shifrat 79-67.

Flamurtari – Partizani           79-67  

(19-19, 20-14, 19-17, 21-17)

Flamurtari: Sinanaj, Kaso, Mino, Kollovi, Nuredini / Sotiri, Toska, Gani, Beko, Bino. Trajner: V. Birçe

Partizani: Pylla, Xhunga, Laçi, Kristo, Deda / Dervishi, Ismeti, Selimaj. Trajner: E. Ismeti

Gjyqtarë: E. Koçi, O. Kasmi, E. Basha (Tiranë)