ASNN – Në javën e dytë të nivelit më të lartë të Kampionatit Kombëtar të Basketbollit për Meshkuj, që njihet si Superliga, Flamurtari regjistroi humbjen e parë këtë sezon, duke u mundur në fushën e Teutës. Kjo humbje erdhi pas fitores javën e parë të kampionatit kundër Partizanit në Vlorë. Sipas kapitenit vlonjat, Klevis Kaso, ekipi i ka të gjitha mundësitë për t’u renditur në 3 vendet e para, pasi në përbërje ka lojtarë të talentuar dhe me eksperiencë:
“Humbja me Teutën sigurisht që na shqetëson disi, por kjo nuk do të thotë se ne s’mund t’i arrijmë objektivat tanë këtë sezon, – ka deklaruar ai për mediat sportive shqiptare të ditës. – Ekipi edhe në këtë ndeshje tregoi një karakter të fortë dhe zhvilloi një lojë mjaft të mirë, duke e vënë kundërshtarin në vështirësi. Teuta është një ekip i mirorganizuar dhe një nga pretendentet e këtij kampionati së bashku me Vllazninë, Tiranën, Partizanin dhe Flamurtarin.”
“Më duhet të theksoj që në këtë ndeshje 3 nga lojtarët tanë kryesorë: Kollovi, Mino dhe Beko ishin të dëmtuar dhe kanë luajtur jashtë mundësive të tyre dhe më duhet të them se kanë bërë një paraqitje pozitive, – ka vijuar Kaso. – Grupi është mjaft i mirë dhe me lojtarë të talentuar të grupmoshave të ndryshme, të cilët i japin ekipit më tepër gjallëri dhe freski fizike në çdo ndeshje.” Në javën e tretë të grupit të elitës së koshit të meshkujve, vlonjatët presin në shtëpi bardheblutë.
“Kam besim se këtë javë do të arrijmë fitoren e dytë, në takimin ndaj Tiranës, falë forcës së grupit tonë dhe talentit të lojtarëve dhe kjo do të na e bëjë më të thjeshtë rrugën drejt objektivit tonë për këtë sezon që është renditja në 3 vendet e para të grupit”, – ka përfunduar kapiteni i Flamurtarit, Klevis Kaso.