ASNN – Derbin e kryeqytetit në basketboll për meshkuj, Partizani-Tirana, e fituan të kuqtë me shifrat 75-63. Në këtë ndeshje derbi fitorja për të kuqtë që drejtohen nga Arben Fagu merr vlerë të madhe, ndërsa në kampin tjetër të Tiranës, që drejtohet nga lojtari-trajner Erkand Karaj, humbja është e rëndë dhe ndikon në moralin e grupit. Madje bardheblutë e kanë parë të pamundur për të përmbysur rezultatin, dhe “dorëzohen” në 20 sekondat e fundit, duke e mbyllur lojën para fërshëllimës finale.
Në përfundim të kësaj ndeshje, pavarësisht fitores, trajneri Fagu u shpreh se nuk pa maksimumin te skuadra e tij, por ka theksuar se nuk ka qenë dakord në disa raste me vendimin e arbitrave, Nga ana tjetër, Karaj i cili prej dy ndeshjes është në krye të stolit të Tiranës, ka thënë se largimi i disa lojtarëve të rëndësishëm këtë sezon ka ndikuar në psikologjinë e lojtarëve bardheblu. Tirana nuk është më ajo skuadra e mëparshme, që i merrte “zvarrë” rivalët, pasi i kanë ikur shumë lojtarë titullarë dhe ende nuk është shfaqur në kapacitetin e saj më të mirë fizik.
Këtë e pranoi dhe vetë lojtari e njëherësh trajneri i bardhebluve, Erkand Karaj, duke folur pas përfundimit të ndeshjes. “E prisja një fillim të vështirë, pasi nuk është Tirana që ka qenë gjithë këto vite, nga e cila janë larguar disa lojtarë kryesorë, – tha ai. – Kemi në përbërje disa lojtarë me eksperiencë dhe disa të tjerë shumë të rinj, të cilët me kalimin e kohës mendoj se do ta rrisin nivelin e tyre duke fituar përvojë dhe do të arrijnë që t’i japin më shumë skuadrës.”
“Këtë ndeshje e nisëm keq dhe patëm një ngërç, – ka vijuar Karaj. – E morëm veten në pjesën e tretë, duke arritur ta ngushtojmë diferencën në katër pikë, por më pas nuk u treguam të zotët që ta mbanim rezultatin të hapur. Partizani shfrytëzoi lodhjen tonë dhe disa pika të forta që ka, duke u shkëputur dhe duke e fituar ndeshjen.” I pyetur se çfarë duhet të presim nga Tirana e drejtuar nga ai këtë sezon, Karaj u shpreh se do të përpiqet që t’u rikthejë besimin dhe të ngrejë moralin tek basketbollistët e vjetër në ekip. Ndeshja e radhës për Partizanin do të jetë kundër Goga Basket dhe e Tiranës kundër Vllaznisë.
