Gjergj Vyshka  13.09.2016 15:15

Kombëtarja është nisur sot drejt Podgoricës për ndeshjen e parafundit eliminatore. Sakaq i gjithë debati i lindur mes trajnerit Kostandinides dhe kapitenit të skuadrës Shima gjatë ndeshjes me Gjeorgjinë është mbyllur që aty. Një gjë të tillë e konfirmuar vetëm qiprioti, i cili e ka quajtur thjesht “nerva loje” dhe “diçka normale në sport”, atë episod që ka ndodhur në parket përballë Gjeorgjisë.

Kombëtarja ka vijuar stërvitjen normale e të gjithë basketbollistët janë të gatshëm nën udhëheqjen e qipriotit të stolit kuqezi, duke shpresuar që në fund këto eliminatore do të mund të mbyllen me një “Happy-End” ndaj Sllovakisë. Ndërkohë, sot në ora 09:00 të mëngjesit, Kombëtarja e basketbollit të meshkujve ka marrë rrugëtimin e saj drejt Podgoricës, atje ku të mërkurën në mbrëmje, në ora 21:00, do të zhvillojë ndeshjen e parafundit ndaj Malit të Zi vendës.

Deri më tani kombëtarja e Shqipërisë në basketboll për meshkuj numëron katër humbje, të cilat janë respektivisht 47-86 me Gjeorgjinë, 73-113 me Malin e Zi, 60-69 me Sllovakinë dhe 64-84 me Gjeorgjinë. Kombëtarja ka ardhur duke e rritur disi nivelin e lojës, por rezultati është ai që mungon, ndërsa shpresohet që një i tillë të jetë në ndeshjen e fundit ndaj Sllovakisë në Tiranë, më 17 shtator 2016.

Edhe në miqësore, me përjashtim të fitores me Katarin, 71-70, të gjitha të tjerat janë humbje duke nisur me Qipron 51-94, me Estoninë 64-71 dhe 49-102, me Izraelin 45-110 dhe me Ukrainën 65-71. E megjithatë kuqezinjtë besojnë se do të bëjnë një tjetër paraqitje të mirë ndaj Malit të Zi, ndërsa të martën pasdite e të mërkurën në mëngjes janë parashikuar dhe stërvitje në Pallatin e Sportit ku dhe do të zhvillohet ndeshja