ASNN – Trajneri i shkodranëve Bledar Gjeçaj: “Bardheblutë kanë më shumë kualitete, ne kemi më shumë energji. Në basketbollin modern triumfon energjia.” E luajtur përmes një atmosfere shumë të ndezur sportive dhe në prani të një publiku rekord, sfida e basketbollit për meshkuj në mes Vllaznisë dhe Tiranës dhuroi mbrëmjen e së shtunës emocione të mëdha për tifozerinë shkodrane. Vetë fakti që Tiranë konsiderohet një prej skuadrave të denja si rivale për fitimin e titullit kampion e bënte këtë ndeshje edhe më interesante dhe të shumëkërkuar nga tifozeria vendase.

Një atmosferë që, siç do të deklaronte për “Sport Ekspres” edhe një prej figurave të spikatura të basketbollit tiranas, ish-titullari në vite i bardhebluve Pirro Koleka, nuk e has kurrkund tjetër përveçse në Shkodër. Dhe kjo, sipas tij, ka qenë në traditë të kahershme për këtë qytet sportdashës që krahas sporteve të tjerë në basketbollin e meshkujve ka qënë përherë rivalë dhe pretendentë i denjë për trofe. Por, gjithnjë sipas Kolekës, merita e këtyre viteve të fundit i takon trajnerit Bledar Gjeçaj dhe inspektorit të lojërave me dorë Astrit Zaganjori, që, ashtu siç kanë ditur të korrin suksese kur luanin vete në fushën e lojës, edhe tani të mbështetur edhe nga shoqata e basketbollit Vllaznia me në krye presidentin Sokol Dibra kanë arritur të krijojnë një ansambël mjaft simpatik.

Ndërkaq, trajneri i Vllaznisë, Bledar Gjeçaj, nuk është parë aspak i qetë në stolin kuqeblu. Madje pati raste që u shfaq jo pak edhe i nervozuar me të tijtë gjë që nuk nguroi ta shprehte edhe në prononcimin e tij të pas ndeshjes. Sidoqoftë, pas kësaj fitoreje ndaj një rivali direkt si Tirana, kuqeblutë e Vllaznisë e shohin veten në krye duke u prezantuar si pretendenti kryesor për fitimin e titullit kampion.

Kampionati Kombëtar

i Basketbollit – Meshkuj

Superliga

Java e 9-të

(4-5 dhjetor 2015)

Partizani – Teuta                              69-82

Flamurtari – Kamza Basket            75-87

Vllaznia – Tirana                              78-67

Renditja

Nr.       Skuadra                     N.        F.         H.        Psh-Pp           Pikë

1. Kamza Basket 9          7          2          687-558         16
2. Tirana             9          7          2          710-618         16
3. Vllaznia             9          7          2          664-581         16
4. Teuta                         9          4          5          678-667         13
5. Flamurtari             9          2          7          590-724         11

6.       Partizani                    9          0          9          525-606         9