ASNN – Është zhvilluar sonte ndeshja e tretë e “play-out”-it të Superligës me Kategorinë e Parë të Kampionatit Kombëtar të Basketbollit për Meshkuj dhe do të jetë Flamurtari ai që do të vazhdojë të mbetet në nivelin më të lartë të koshit shqiptar, pasi ka fituar me shifrat 71-60, duke triumfuar me rezultatin e përgjithshëm 2-1.

Siç dihet, Flamurtari u rendit në vendin e parafundit të Superligës, ku Apolonia u rendit e fundit dhe zbriti një kategori më poshtë. Ndërsa Studenti u rendit i dyti në Kategorinë e Parë, ku Teuta e mbylli në krye dhe fitoi automatikisht të drejtën për t’u ngjitur në Superligë.

Në bazë të formulës së miratuar në fillim, e 5-ta e Superligës përballet në një duel shtesë prej 3 ndeshjesh me të dytën e Kategorisë së Parë. Flamurtari e pati mundur Studentin me rezultatin 56-40, në ndeshjen e parë, duke hedhur kështu një hap drejt qëndrimit në nivelin më të lartë të koshit shqiptar.

Por Studenti i qe kundërpërgjigjur “flakë për flakë” në të dytën, duke e mundur Flamurtarin në kryeqytet dhe duke e çuar gjithçka në ndeshjen e tretë. Kjo ndeshje, e zhvilluar sonte në Vlorë, ka folur kryesisht për Flamurtarin vendas, që e ka vendosur diktatin që në 10-minutëshin e parë, të cilin e ka fituar thellë, 21-12.

Studenti i Henri Mojës reagon disi në atë të dytin, por janë vlonjatët që e fitojnë këtë fraksion loje 18-17 dhe shkojnë në pushim të ndeshjes me epërsinë 10-pikëshe, 39-29. Edhe pjesa e tretë e lojës fitohet nga vlonjatët, 16-9, çka e bën pjesën e 4-t, që u fitua nga kryeqytetasit 22-16, një formalitet, pasi Flamurtari fiton 71-60 dhe mbetet në Superligë.

Flamurtari-Studenti             71-60              (2-1)

(21-12, 18-17, 16-9, 16-22)

Flamurtari: Kaso (15), Kollovi (4), Toska (10), Beko (18), Meminaj (13). U aktivizuan: Mino (4), Sotiri (11), Vasjari, Gani, Bimo, Sinanaj). Trajner: V. Birçe

Studenti: Fjolla (22), Lame (12), Kasemi, Latifi, Ferra(4). U aktivizuan: Qeleshi (3), Danushi (4), Brari (8), Beqo (2), Tufa (3), Shahini (2). Trajner: H. Moja

Gjyqtarë: G. Cici, E. Koçi, G. Shaqiri

Kampionati Kombëtar

i Basketbollit – Meshkuj

Kalendari i “Play-Out”-it

Superligë – Kategori e Parë

Ndeshja e parë

(10 prill 2015)

Flamurtari – Studenti          56-40              (1-0)

Ndeshja e dytë

(14 prill 2015)

Studenti – Flamurtari          67-58              (1-1)

Ndeshja e treta*

(17 prill 2015)

Flamurtari – Studenti          71-60              (2-1)

* Nëse do të ishte e nevojshme.