Elbasani e ka bërë “përshesh” Tirana Eagles-in dje në Pallatin e Sportit “Asllan Rusi”, teksa ka fituar me 36 pikë, ndërsa tashmë i ka shtuar shanset vetes për t’u ngjitur në Superiore. Është vetëm dy pikë larg vendit të parë, e cila mbahet me meritë nga Ardhmëria, që të ngjit direkt në Superligë, por dhe një pikë larg vendit të dytë, i cili mbahet nga Superior Klima, që të dërgon në “play-off”. Sigurisht që ka edhe dy faza të tjera deri në përfundim, por sfida e së shtunës në “Tomorr Sinani” mes Elbasanit dhe Ardhmërisë është vendimtare për pozicionimet e skuadrave në renditje në përfundim të pjesës së parë të sezonit.
Dhe parë kështu trajneri i Ardhmërisë, Afrim Bilali, për një pjesë të mirë të ndeshjes së djeshme ka qenë i pranishëm në Pallatin e Sportit “Asllan Rusi” në kryeqytet. Por nuk duket se është kjo ndeshja për të krijuar përshtypjen për Elbasanin, sepse ekipi i trajnerit Sinani pati përballë një kundërshtar të dobët. Që do të thotë se elbasanasit luajtën “liro-shtrëngo”, por në fund e morën atë që deshën. Kështu ka nisur pjesa e parë, Tirana Eagles ka humbur disa sulme dhe Elbasani, duke e rrëmbyer topin në tabelë, me sulmin e shpejtë ka arritur që ta mbyllë pjesdën e parë me një diferencë të admirueshme, 2-25.
Këtu nis edhe një farë nënvlerësimi nga elbasanasit, të cilët janë të pasaktë në gjuajtjet e tyre. Në një kohë që një gjë e tillë nuk ndodh me Tirana Eagles, që duke fituar pjesën e dytë 14-7 arrin të ngushtojë në 16-32. Por vetëm kaq. Miqtë nuk tolerojnë dhe fitojnë të dy pjesët e tjera, 9-27 dhe 19-21 dhe në total 44-80. Në përgjithësi nëse Elbasani do të kishte mbajtur ritmin e pjesës së parë mund të kishte edhe një fitore më të thellë se sa me 36 pikë diferencë. Por në fund të fundit përballë një kundërshtari që përpiqet të luajë basketboll edhe kështu vlen.
Tirana Eagles – Elbasani 44-80
(2-25, 14-7, 9-27, 19-21)
Eagles: Ambo (4), Skëndaj, Bilbili (4), Tufa (6), Kala (8) / Adili (7), Prodani (2), Lipo (7), Zelaj (1), Dashi, Halilaj (4), Nallbani (1). Trajner: K. Dedaj
Elbasani: B. Skëndaj (18), A. Çela (20), Balliu (2), Uruçi (12), F. Çela (7) / Biçoku (4), Leka (5), I. Skëndaj (8), Mata (4). Trajner: B. Sinani
Gjyqtarë: A. Dulçe, E. Tiko (Tiranë)
Kampionati Kombëtar
i Basketbollit – Meshkuj
Kategoria e Parë
Java e 9-të
(5-6 dhjetor 2015)
Të shtunën:
Superior – Ardhmëria Basket 47-61
Të dielën:
Tirana Eagles – Elbasani 44-80
Skënderbeu pushim
Renditja
Nr. Skuadra N. F. H. Psh-Pp Pikë
- Ardhmëria Basket 7 7 0 498-289 14
- Superior Klima 8 5 3 558-430 13
- Elbasani 7 5 2 546-422 12
- Skënderbeu 7 1 6 355-469 8
- Tirana Eagles 7 0 7 307-527 7
