ASNN – Ngadhënjejnë në gjysmëfinale, dueli i së shtunës (18:00), drejtpërdrejt në RTSH Sport. Pas femrave, edhe Kupa e Shqipërisë në basketboll për meshkuj ka nisur të premten “4-shen” e saj finale, teksa janë luajtur dy gjysmëfinalet, të cilat në fakt kanë qenë “rrugë me një kalim”. Kjo sepse Besëlidhja dhe Tirana kanë mbizotëruar, përkatësisht ndaj Vllaznisë dhe Kamzës, duke siguruar vendin në finale.

Kupa e Shqipërisë në basketboll për meshkuj ka nisur të premten në mbrëmje “4-shen” e saj finale, teksa janë luajtur dy gjysmëfinalet, të cilat u sollën për sportdashësit drejtpërdrejt në Rrjetin e Radio-Televizionit Shqiptar. Në fakt kanë qenë “rrugë me një kalim”, sepse Besëlidhja dhe Tirana kanë mbizotëruar, përkatësisht ndaj Vllaznisë dhe Kamzës, duke siguruar vendin në finale.

Në takimin e luajtur më herët, që erdhi drejtpërdrejt në RTSH 3, Besëlidhja ka vendosur diktatin që në dy 10-minutëshat e parë, duke e fituar të parin me 10 pikë epërsi, 27-17, dhe të dytin 29-22, dhe duke shkuar kështu në pushimin midis dy gjysmave duke kryesuar bindshëm, me shifrat 56-39. 10-minutëshi i 3-të është fituar nga Vllaznia me një pikë epërsi 25-24, por lezhjanët i kthejnë reston, duke e marë atë të 4-tin dhe të fundit 26-25 dhe duke e fituar gjithë ndeshjen 106-89.

Besëlidhja kualifikohet për në finale, aty ku do të përballet me Tiranën, e cila, në një përkim të pazakontë, i ka mbyllur dy pjesët e para të lojës me të njëjtën sasi pikësh të realizuara, 56-29, teksa kryeqytetasit e fitojnë bindshëm, 32-13, 10-minutëshin e fillimit, kurse atë të dytin e marrin me shifrat 24-16. Edhe në gjysmën e dytë të ndeshjes, skuadra e drejtuar nga trajneri Erkan Karaj ka vijuar të mbizotërojë, duke e thelluar edhe më tepër epërsinë.

Kjo, pasi 10-minutëshin e 3-të e ka marrë me shifrat 21-18, kurse atë të 4-tin 29-19, dhe gjithë ndeshjen me epërsinë e thellë, 106-66. Kështu, dy skuadrat që i kanë dhënë tonin koshit shqiptar në këto dy vitet e fundit, Besëlidhja dhe Tirana, do të përballen me njëra-tjetrën të shtunën për trofeun e parë të këtij sezoni, me finalen që do të vijë drejtpërdrejt në RTSh Sport, duke nisur nga ora 18:00.

Kupa e Shqipërisë

Basketboll – Meshkuj

Gjysmëfinalet:

Kamza Basket – Tirana         66-106 (13-32, 16-24, 18-21, 19-29)

Besëlidhja – Vllaznia           106-89 (27-17, 29-22, 24-25, 26-25)

Finalja

Tirana – Besëlidhja              (Të shtunën, ora 18:00)