ASNN – Bashkimi pëson disfatën e radhës në Ligën Ballkanike, mposhtet nga kazakët. Kështu, në kuadër të Ligës Ballkanike, skuadra e basketbollit të Prizrenit, Bashkimi, u mund nga skuadra e Kazakistanit, Barsi Atiraut, me rezultatin 81-75. Ishte një takim i dominuar nga ekipi i Kazakistanit, sidomos në dy 10-minutëshat e parë, pasi kazakët u distancuan me fro 10 pikë, duke i vënë “kapak” ndeshjes dhe rezultatit që në pjesën e parë të lojës.
Kështu, 10-minutëshi i parë u fitua nga kazakët 26-15. Më shumë ishte një paraqitje e dobët e skuadrës prizrenase sesa forcë e kazakëve, gjë që solli diferenca të ndjeshme në shifra. 10-minutëshi i dytë fitohet sërish nga Barsi Atirau me shifrat 22-14, duke shkuar në pushimin e madh të takimit në kryesim 48-29. Një diferencë e tillë tregon jo vetëm superioritetin e kazakëve, por dhe dobësinë e ekipit të Bashkimit. Sidoqoftë, shtatlartët shqiptarë të Prizrenit e përmirësuan ndjeshëm lojën në dy pjesët e tjera.
Madje ata i fituan të dyja pjesët, me shifta bindëse. Kështu, 10-minutëshi i tretë përfundoi me shifrat 23-15 në favor të Bashkimit. Edhe 10-minutëshi i katërt dhe i fundit u fitua nga skuadra prizrenase 23-18. Por këto suksese të dy pjesëve të fundit nuk e përmbysën rezultatin e ndeshjes që përfundoi 81-75 në favor të Barsi Atiraut. Bashkimi pëson kështu humbjen e radhës, duke humbur vazhdimisht terren.
Ndërkohë, më 11 janar, skuadra kazake e Barsi Atiraut do të presë një tjetër ekip shqiptar, Teutën e Durrësit, në duelin e kthimit, ndërsa duhet theksuar se, sikundër ndeshja e parë me bregdetarët, ashtu edhe takimi i kthimit, por edhe ndeshja me Bashkimin, janë programuar të zhvillohen në Pallatin e Sportit “Ramazan Njala” të Durrësit, për arsye logjistike.
Barsi Atirau – Bashkimi Prizren 81-75
(26-15, 22-14, 15-23, 18-23)
Renditja:
Nr. Skuadra N. F. H. Pikë
- BC Akademik Bulteks 8 5 3 13
- KS Teuta 7 4 3 11
- BC Beroe 5 5 0 10
- KK Blokotehna-NB 5 4 1 9
- KK Kozhuv 6 1 5 7
- KB Bashkimi 6 1 5 7
- BC Barsi Atirau 5 1 4 6
