ASNN – Barleti Eagles, skuadra që drejtohet nga Klarent Dedaj, ashtu sikurse në çdo merkato dimri edhe këtë herë është përforcuar. Janë të paktën gjashtë lojtarë që kanë ardhur në këtë skuadër, e cila për herë të parë militon në elitën e basketbollit shqiptar. Katër janë lojtarë të rinj dhe dy janë rikthime. Kështu, të paktën edhe sipas trajnerit Dedaj, janë afruar në këtë skuadër Qirjako Dervishi i datëlindjes 1994, 1.90 centimetra dhe luan në pozicionin 1.
Pas tij ka ardhur nga Partizani, Besjan Selimaj i datëlindjes 1988, 2.05 centimetra i gjatë, që luan si qendër ose në pozicionin 5. Afrimi i tretë është Silver Xhexhaj i datëlindjes 1994, 1.90 centimetra i gjatë, që luan në pozicionin dy dhe tre. Po kështu ka ardhur dhe Vasil Beçolli i datëlindjes 1998, 1.86 centimetra i gjatë, luan në pozicionin 2. “Të rikthyerit, – shpjegon Dedaj, – janë Glen Prodani i datëlindjes 1995, 1.86 centimetra i gjatë, luan në pozicionin 1 dhe 2.
Po kështu është kthyer dhe Xhejms Nallbani i datëlindjes 1997, 1.93 centimetra i gjatë, luan në pozicionin 4”. Por skuadra ka pasur dhe largime, ndërsa sipas Dedajt me dëshirën e tyre kanë ikur nga Barleti-Eagles, Xhoen Tugu, Arlind Vogli, Herli Serdari dhe Mikel Ambo. “Po kështu, – thotë trajneri i Barleti-Eagles, – janë larguar Indrid dhe Bruno Skëndaj, që kanë pasur kërkesa nga ekipet e tjera e që në fakt kanë nevojë për t’i pasur në skuadër për tejkalimin e pritshmërive të tyre.”
Por Barleti-Eagles, edhe pse ndodhet në vendin e fundit, kërkon që më këto ardhje të reja të bëjë maksimumin pse jo për të qenë një kundërshtar i vështirë për të gjithë e më pas dhe për të fituar ndeshjet. “Ardhjet e reja, – shpjegon Dedaj, – janë për të konsoliduar skuadrën dhe për ta përdorur si përgatitje për sezonin e ardhshëm. Kjo nuk do të thotë se jemi dorëzuar.”
“Përkundrazi do të luajmë fort dhe me maksimumin në çdo ndeshje, – ka vijuar ai. – Thjesht duam të provojmë deri në fund dhe për këtë ndërhymë dhe afruam lojtarë të rinj”. E prova e parë me këto ardhje të reja do të jetë të shtunën në Kupën e Shqipërisë ndaj Partizanit në fazën eliminatore.
