Për bardheblutë, në ndeshjen me Pejën, ka munguar Griffin Rame, sepse sipas menaxherit të përgjithshëm të klubit bardheblu, Anxhelo Koleka, ka pas një dëmtim në hundë në ndeshjen e së martës së kaluar me Karposh Sokolin. “Dhe duke e ditur që për ne ishte një ndeshje thjesht për të respektuar kalendarin, atëherë vendosëm ta ruajmë, sepse tashmë na duhet të përqendrohemi në kampionat”, – ka sqaruar administratori bardheblu.

“Është lojtar i rëndësishëm për ne dhe duhet të jetë gati ashtu sikurse të gjithë basketbollistët e tjerë për ndeshjen e parë me Vllazninë”, – ka shtuar Koleka. Ndërkohë trajneri i bardhebluve, Nikola Milatoviç, në përfundim të ndeshjes me Pejën ka pohuar se skuadra nga Kosova e ka merituar fitoren, edhe sepse kjo ka qenë skuadra më e mirë e grupit B.

“Kemi luajtur duke pasur dhe një farë rotacioni në skuadër duke përdorur lojtarë, të cilët nuk kanë pasur minuta të shumta, apo mundësi të mëdha në ndeshjet e mëparshme, – ka thënë ai. – Mendoj që kemi një grup të rinjsh të mirë, të cilët mund t’i përdorim për pjesën e mbetur të sezonit.” Sakaq Shima si kapiteni i Tiranës e parashikon Pejën si një ndër tre skuadrat më të mira të Ligës Ballkanike për sezonin 2017-2017.

“Kemi dhënë më të mirën tonë, por nuk ka qenë e mjaftueshme për të surprizuar vendësit, – ka thënë basketbollisti i spikatur i bardhebluve dhe ekipit kombëtar. – Do të doja që ish-skuadra ime të kishte më shumë fat në fazën e dytë të Ligës Ballkanike”, ka përfunduar Shima, kurse Tirana tashmë i ka dhënë lamtumirën Ligës Ballkanike në basketboll për meshkuj.