Teuta në basketboll për meshkuj ka fituar me përmbysje dje në mbrëmje në Sallën Sportive të Bathores ndaj Kamza Basket. Skuadra e drejtuar nga Sotiraq Mëngjezi, pasi durrsakët kanë larguar Artan Terihatin pas humbjes 59-62 në Shkodër me Vllazninë vendëse, nga -16 disavantazh në pushimin e lojës e ka kthyer në favorin e vet në një fitore në fund me +7 pikë diferencë.

E sigurisht që ka një emër në fitoren e durrsakëve. Robert Shestani mbetet gjithnjë inspiruesi i sukseseve të Teutës. Ka shënuar 31 pikë, 6 trepikësha. Dhe kaq ka mjaftuar që ai të jetë më i miri i “Djemve të detit” që kështu i janë gëzuar këtij suksesi, i cili ka qenë më shumë se sa i vështirë.

Në fakt nuk duhet lënë mënjanë dhe loja e mirë e Daliut, Janit, Thanos, Aliajt (ky i fundit në dy pjesët e dyta ka qenë vendimtar me 3-pikëshat e tij) dhe Pashës. Kamza Basket pati dëshirën. Madje në një ditë të mirë të Çelës, që ka shënuar 28 pikë, por dhe të Llazanit, Vaqarrit e Hamatit mund dhe duhet të kishte bërë më shumë.

Veçse nëse durrsakët kishin një shtrirje më të gjërë të pikëve të shënuar në shumicën e lojtarëve të aktivizuar, tek Kamza Basket duke nisur që nga Birçaj e për të vijuar më pas me Gjokën e Fjollën kanë qenë në fushë sa për të thënë se ishin. E vetëm me katër lojtarë Kamza Basket e ka pasur të vështirë të mbajë suksesin e krijuar.

Kamza Basket – Teuta                     83-90

(25-22, 25-12, 18-33, 15-23)

Kamza Basket: Llazani (15), Çela (28), Vaqarri (11), Hamati (15), Birçaj / Qeleshi (14), Gjoka, Fjolla. Trajner: A. Muhametaj

Teuta: Daliu (11), Gorea (4), Shestani (31), Jani (14), Thano (8) / Veselagu, Strazimiri, Aliaj (12), Pasha (10). Trajner: S. Mëngjezi

Gjyqtarë: G. Cici, E. Koçi (Tiranë), H. Trajer (Shkodër)

Kampionati Kombëtar

i Basketbollit – Meshkuj

Superliga

Java e 6-të

(18-19 nëntor 2016)

Të premten:

Vllaznia – Tirana                              66-84

Kamza Basket – Teuta                    83-90

Të shtunën:

Flamurtari – Ardhmëria Basket      ora 13:00

Renditja

Nr.       Skuadra                     N.        F.         H.        Psh-Pp           Pikë

1. Tirana                         6          6          0          519-384         12
2. Teuta                          6          4          2          468-384         10
3. Vllaznia                     6          3          3          431-415           9
4. Kamza Basket          6          3          3          446-443           9
5. Ardhmëria Basket    5          1          4          330-332           6
6. Flamurtari                  5          0          5          222-459           5