ASNN – Endrju Uigins paguhet 30 milionë dollarë në vit, por rregulli i mosvaksinimit e kufizon. Paguhet plot 29.5 milionë dollarë në vit, por basketbollisti kanadez, Endrju Uigins, nuk do të mund të luajë ndeshjet në shtëpi me skuadrën e tij të Golden Stejt Uorriërs. Shkak për këtë është bërë vendimi i basketbollistit kanadez që të mos bëjë vaksinën anti-Covid 19, e cila në shtetin e San Franciskos është e detyruar për të gjithë personat mbi 12 vjeç, për të marrë pjesë në evenimentet madhore.

Basketbollisti kanadez formuloi një kërkesë ndaj autoriteteve, ku kërkoi një përjashtim, pasi e justifikoi refuzimin e vaksinës me çështje fetare. Megjithatë kjo u hodh poshtë dhe tani Uigins do ta ketë të pamundur të luajë në ndeshjet në San Françisko. Klubi i Golden Stejt Uorriërs nuk është shprehur ende zyrtarisht për këtë çështje, megjithatë duket e pamundur që të ndërhyhet në vendimin personal të sportistit 26-vjeçar kanadez.

I pyetur në lidhje me këtë çështje disa muaj më parë, vetë Uigins deklaroi se nuk ka ndërmend të bëjë vaksinën, nëse nuk do të detyrohet nga ndonjë arsye madhore, ndërsa tani pritet të shihet se çfarë vendimi do të marrë kanadezi, pasi i është ndaluar të luajë ndeshjet në shtëpi. “Unë nuk jam kundër vaksinës, por për momentin nuk kam ndërmend ta bëj”, – ka thënë ai.

“Gjithsecili vendos për vete dhe nuk kritikoj aspak ata që e bëjnë, por unë nuk kam ndërmend të bëj diçka të tillë në trupin tim, të paktën për sa kohë që nuk më detyrojnë rrethana të caktuara”, – pati shtuar Uigins, i pyetur disa muaj më parë. Endrju Uigins është një nga basketbollistët më të rëndësishëm të Golden Stejt Uorriërs, pasi e mbylli sezonin e kaluar me një mesatare prej 18.6 pikësh dhe 4.9 topash në tabelë për ndeshje, shifra këto vërtetë mbresëlënëse.