ASNN – Pas dy vjetësh disfata të njëpasnjëshme, më në fund Los Anxheles Lejkërs kanë thyer Golden Stejt Uorriërs në NBA-në amerikane. Ka qenë një fitore e madhe e Lejkërsave në Konferencën e Perëndimit, pikërisht ndaj një kundërshtari që e ka dominuar kampionatin amerikan të koshit këto vitet e fundit. Los Anxhelos Lejkërs fituan me rezultatin e thellë 127-101 duelin me rivalin e fortë, duke dhënë sinjalet e një ringjalljeje të madhe.
Në këtë ndeshje shkëlqeu deri në 10-minutëshin e 3-të gjigandi LëBron Xhejms, i cili realizoi 17 pikë dhe zotëroi 13 topa në tabelë, si dhe 5 pasime për kosh. Statistika mjaft të mira dhe me peshë në ecurinë e ndeshjes e të rezultatit në favor të Lejkërsave. Por Xhejms dëmtohet dhe detyrohet të tërhiqet. “Mbreti Xhejms” e la gjurmën e tij në këtë ndeshje, por dëmtimi i tij futi jo pak në ankth stafin.
Dhe mbetet të mësohet se si është gjendja. Informacionet paraprake thonë se ishte një lëndim i lehtë pa ndonjë pasojë dhe Xhejmsi do të kthehet shumë shpejt në parket. Lejkërsat kanë filluar të rikuperojnë në garë, por u mungon qëndrueshmëria në lojë e rezultate, gjë që është evidente këtë sezon.
