Gentian Cici, gjyqtari ndërkombëtar i basketbollit shqiptar, i cili gradualisht është duke i ngjitur majat e karrierës së tij, këtë vit përveç “bilbilit” në “FIBA Europe Cup”, është dhe në Ligën e Kampioneve. Pikërisht në këtë të fundit ka 6 ndeshje deri më tani. E ka nisur më 27 shtator 2016, në turin paraeliminator, ndërsa ka qenë në Itali në ndeshjen Vareze-Benfika Lisbonë 70-72. Mandej, më 19 tetor 2016 do të ishte në ndeshjen e grupit D, Mornar-Ostende 74-72.

Për të vijuar pas një jave në Stamboll në ndeshjen e grupit E, Beshiktash-Partizani Beograd 77-62. Më 1 nëntor 2016, bilbili i tij do të ndihej në Francë në Strasburg, atje ku skuadra vendëse ka fituar për grupin D, 74-64 ndaj Ostendes. Fundjavën e kaluar do të ishte në dy ndeshje në Izrael. Fillimisht do të ishte gjyqtar i dytë në ndeshjen e grupit A, mes Ironi Naharia-Helion Sans 76-61, ndërsa do të ishte së bashku me spanjollin Vinsente Bulton dhe italianin Tolga Sahin.

Të tre së bashku do të ishin një ditë më pas në ndeshjen e grupit, Makabi Rand Media-Avtodor Saratov 74-98. Por Cici nuk ka mbetur pas edhe në Fiba Europe Cup, atje ku më 8 dhe 9 nëntor 2016 tashmë si gjyqtar i parë do të ishte në dy ndeshje. Pjesë e trupës së tij do të ishin letonezi Martinas Gudas dhe bullgari Ventsislav Velikov. Më parë do të ishte në ndeshjen e grupit A Elan Shalon-Bruksel 78-74 dhe më pas në ndeshjen Nanterre-Sopron 106-75.

Kësisoj “bilbili” i Cicit vijon të ndihet fuqishëm në arenën ndërkombëtare, ndërsa sezoni ka nisur me 8 ndeshje. E thënë ndryshe javë pas jave.