ASNN – Në fakt, të gjithë ata njerëz që bëjnë sport në Shqipëri, mund të cilësohen “heronj”, për vetë rrethanat dhe kushtet në të cilat e bëjnë një gjë të tillë. Ndonëse moti ka tekat e veta, siç po ndodh në këto ditë të para të 2017-ës, ajo që e bën më heroike marrjen me sport në Shqipëri, është gjendja e mjeruar e infrastrukturës sportive në vend.
Foto që shoqëron këtë artikull, është e vajzave të ekipit durrsak të Goga Basket para zhvillimit të seancës së sotme stërvitore. Vetë fotoja flet më tepër sesa çdo koment që mund t’i bënim, ndërsa interesant është një fakt tjetër që e përcjellin për AlbanianSport.com vetë vajzat basketbolliste, disa prej të cilave janë edhe lojtare të Kombëtares së koshit kuqezi.
“Temperatura sot jashtë ishte -4 gradë Celcius në Durrës, ndërsa temperature brenda sallës së madhe të Pallatit të Sportit “Ramazan Njala”, ishte -5 gradë Celcius”, – pohoi njëra nga basketbollistet e Goga Basket. Mund të imagjinohet se në çfarë kushtesh është zhvilluar seanca e sotme stërvitore e këtyre vajzave, ndërsa rasti në fjalë nuk është i vetmi e aq më pak i pari në sportin shqiptar.
Më së fundmi, edhe një trajneri i një ekipi përfaqësues vajzash ka pohuar për AlbanianSport.com se moti i keq, po në Pallatin e Sportit në Durrës, e kishte penguar në zhvillimin normal të seancave stërvitore në prag të një turneu madhor ndërkombëtar. Natyrisht, “Ramazan Njala” nuk është i vetmi mjedis sportiv që e vuan këtë problem, pasi ky mbetet një shqetësim për sportin shqiptar në shkallë kombëtare.
