Vllaznia në basketboll për femra e ka nisur me këmbë të mbarë sezonin 2015-2016. Ka fituar në një fushë që asnjëherë nuk ka pasur mundësi të jetë triumfuese, siç është ajo e Bathores. Jo vetëm kaq, por Kamza Basket, të paktën edhe sezonin e kaluar, ka ditur të fitojë edhe në Shkodër. Por tashmë gjërat kanë ndryshuar. Skuadra e Rashjes, e përbërë nga dy Dashjat, Berranija, Mustafa e Çoçja e ka gjithçka nën kontroll. Luan mirë në mbrojtje zonale, aq sa i krijon vështirësi Kamzës që të gjuajë në koshin shkodran.
Madje edhe pika më e fortë e skuadrës së Avramit, që është kapitenia Aida Vata, e ka pasur të vështirë të çajë në qendër dhe të shënojë. Megjithëse ka qenë e saktë në gjuajtjet e lira. Por Kamza Basket ia ka arritur të fitojë pjesën e parë 12-11, ndonëse shkodranet kanë qenë edhe në epërsi. Diferenca e Rashjes që e bën skuadrën e Vllaznisë më të plotë në fushë është Basha. Lirohet Berranija, por dhe I dhe A. Dashja, bashkë me Mustafën nuk falin. Të qarta në qarkullimin e topit, hera-herës me hyrjen dhe dalje nga zona e mbrojtjes së Kamzës, shkodranet kanë arritur që të shënojnë.
E vetmja që është munduar ta mbajë në lojë skuadrën e Avramit është Gridi Sokoli. Sa herë që individualisht depërtonte në zonën shkodrane, aq herë shënonte. Dhe dy herë me radhë, duke qenë e saktë edhe nga gjuajtjet për tre pikë, Sokoli e ka nxjerrë Kamza Basket në epërsi, 24-23 dhe 30-29. Por nuk mjafton, sepse Vllaznia ka shkuar në dhomat e zhveshjes me epërsinë 30-31. Në pjesën e tretë, edhe pse gjithnjë Sokoli është kërcënimi më i madh i shkodraneve, Vllaznia jo vetëm administron, por dhe thellon.
Sepse e gjithë pjesa tjetër e Kamza Basket, përtej ndërhyrjen të Avramit me lëvizje nga stoli, apo dhe pushime, duket se ka qenë në një ditë jo. 14-21 është pjesa e tretë për Vllazninë, e cila ka thelluar në 44-52. E fundit, kur kishin kaluar 1 minutë e gjysmë nga starti, dënon më keq skuadrën e Avramit, sepse Vata me një faull në sulm ka plotësuar numrin pesë të gabimeve personale. Vetëm Sokoli ishte pak përballë saktësisë së shkodraneve në të gjitha drejtimet. 6-15 dhe në fund 50-67 për Vllazninë, e cila kështu po krijon bindjen se është duke e risjellë dhe një herë traditën e mirë që ka pasur kaherë basketbolli i femrave të Shkodrës.
Kamza Basket – Vllaznia 50-67
(12-11, 18-20, 14-21, 6-15)
Kamza Basket: Ymeri (2), Bakalli, Sokoli (27), Vata (10), Matka (2) / Hoxha (8), Merdani, Oruçi, Kuçi (1). Trajner: R. Avrami
Vllaznia: I. Dashja (21), Mustafa (6), Çoçja, A. Dashja (8), Berranija (19) / Basha (13). Trajner: R. Rashja
Gjyqtarë: G. Hoxha, O. Kasmi (Tiranë)
