ASNN – Shpërthen Flamurtari, fitore me 30 pikë diferencë me Goga Basket. Vlonjatet kanë treguar se nuk janë ato të para dy javëve, përkundrazi janë të afta për të qenë përsëri “kampion”, ndërsa ndeshja e parë finale ka dhënë sinjale të forta se titulli do të jetë përsëri për ta. Për trajnerin e Flamurtarit, Viron Toska, kjo ishte një ndër ndeshjet më të bukura të sezonit.

“Padyshim, ishte një nga ndeshjet më të bukura të Flamurtarit në këtë kampionat, – ka pohuar ai. – Kemi zhvilluar një ndeshje të shkëlqyer duke treguar edhe një herë se kërkojmë sërish të shkojmë tek titulli dhe të rikonfirmohemi si “kampion”. Skuadra ka luajtur mjaft mirë taktikisht në çdo moment të ndeshjes dhe kemi fituar ndaj një skuadre të fortë.”

“Tashmë mendojmë vetëm për ndeshjen e dytë finale në Durrës”, – ka thënë në përfundim të ndeshjes, trajneri i Flamurtarit në basketboll për femra, Viron Toska. Ndërsa për homologun e tij, trajnerin e Goga Basket, Astrit Greva, asgjë nuk ka përfunduar, pasi janë edhe katër ndeshje për t’u luajtur. “Flamurtari e meritoi fitoren”, – e pranoi ai pas ndeshjes.

“Vajzat e Flamurtarit i zbatuan mjaft mirë detyrat e dhëna nga trajneri në ndryshim nga ajo çfarë unë kisha porositur tek skuadra ime, e cila nuk arriti aty ku duhej, – vijoi më tej veterani i stolit të koshit shqiptar. – Në asnjë mënyrë ajo fitore në fund të fazës së tretë nuk kishte vlerë sot, ndërsa gjithçka mbetet e hapur deri në fund. Sepse janë për t’u luajtur dhe 4 ndeshje të tjera.”