Tirana e basketbollit e ka mbyllur vitin 2016 si kryesuese e dyfishtë. Për meshkuj, në 10 ndeshje, 9 fitore dhe një humbje, kurse për femra, në 8 ndeshje, 8 fitore dhe asnjë humbje. Dhe duke qenë absolut bien në gabime që nuk i shkojnë për shtat një klubi me histori si Tirana.

Gjithçka ka ndodhur tek femrat, atje ku në mungesë të një tavoline gjyqtarie të licencuar nga Federata Shqiptare e Basketbollit mbajtësen e protokollit e ka bërë ndihmëstrajnerja Mirza Alibegaj, mbajtësen e tabelës së pikëve Adelajda Aliaj dhe atë të 24-sekondëshit Popoviç.

Sepse nëse Aliaj ka qenë e dëmtuar, Avrami e ka parë të arsyeshme të mos aktivizojë dhe malazezet Popoviç e Jankoviç e në fushë ka pasur nga titullaret vetëm Eliverta e Gera Bujari, Përmetin e Dishnicën. Të gjithë të tjerat të reja në një ndeshje pa shumë histori.

Mirëpo nuk mbaron me kaq, ndërsa rezultati i ndeshjes është mbyllur në protokoll ende pa mbaruar takimi, teksa dy minutat e fundit janë luajtur thjesht sa për të dëgjuar vërshëllimën e fundit të Bashos e Gokajt. E në përfundim 81-60, ndërsa Apolonisë i është bërë nderi duke i dhënë disa pikë nga “xhepi”.

E në fakt një fenomen i tillë përsëritet tek Tirana, sepse po kështu kanë bërë dhe në javën e dytë të kampionatit ndaj Kamza Basket, të fituar nga bardheblutë 100-46. Pavarësisht këtyre problemeve, të kalueshme në dukje, por në fakt jo serioze për një klub me emër, Tirana është kryesuese me meritë e femrave në këtë gjysmë sezoni.

Tirana – Apolonia                81-60

(27-13, 22-13, 16-16, 16-18)

Tirana: E. Bujari, Përmeti (7), Dishnica (20), G. Bujari (14), Jaçe (14) / Konini (10), Kelleci (10), Beleshi (6), Ahmataj, Malësia. Trajner; R. Avrami

Apolonia: Demiraj (30), Kasaj (17), Hyska (5), Velias (4), Mahmutaj / Çuko (4), Tahiraj, Lolaj, Begaj. Trajnere: H. Çuko

Gjyqtarë: G. Basho, J. Gokaj (Shkodër)

Kampionati Kombëtar

i Basketbollit – Femra

Kategoria e Parë

Java e 9-të

(21-22 dhjetor 2016)

Të mërkurën:

Tirana – Apolonia                            81-60

Skënderbeu – Elbasani                  97-76

Vllaznia – Studenti                          71-56

Goga Basket – Flamurtari               69-63

Kamza Basket                                  pushim

Renditja

Nr.       Skuadra                     N.        F.         H.        Psh-Pp           Pikë

1. Tirana                         8          8          0          601-472         16
2. Goga Basket             8          7          1          668-457         15
3. Flamurtari                  8          6          2          608-521         14
4. Vllaznia                     8          5          3          545-471         13
5.        Studenti                     8          4          4          514-507         12
6. Skënderbeu              8          3          5          522-548         11
7. Elbasani                    8          2          6          560-607         10
8. Apolonia                    8          1          7          485-639           9
9. Kamza Basket          8          0          8          414-695           8