ASNN – Të premten u luajt në kryeqytet dueli derbi në basketboll për femra, midis SHKBF Tirana të trajnerit Erdal Borova dhe SHBF Tirana të trajneres Mirza Alibegaj. Fitoi skuadra e kësaj të fundit me rezultatin e ngushtë 59-57. Ishte një ndeshje ku emocion prodhoi sidomos 10-minutëshi i fundit, ku vajzat e skuadrës së homologut Borova tentuan të përmbysnin ndeshjen, por një dypikësh i skuadrës tjetër bardheblu ua hoqi këtë mundësi.

Ndeshja pritej të kishte rivalitet dhe nuk zhgënjeu në këtë drejtim. Dihet që rivaliteti midis dy skuadrave të Tiranës në basketbollin e femrave është shumë i fortë dhe tejkalon edhe aspektet sportive, nisur nga pretendimi i përfaqësimit. Sidoqoftë, në parket pati rivalitet dhe emocion. 10-minutëshi i parë u fitua nga SHBF Tirana e Alibegajt 18-14, ndërsa 10-minutëshi i dytë përfundoi në barazim me shifrat 16-16. Në 10-minutëshin e tretë ekipi i Alibegajt thelloi diferencën.

Sepse e fitoi atë 14-7 dhe me 11 pikë diferencë dukej fituese e padiskutueshme e këtij dueli derbi. Por jo, në 10-minutëshin e katërt dhe të fundit ishin vajzat e Borovës që shkëlqyen në parket dhe ishin shumë pranë përmbysjes së ndeshjes. Ishte kapitenia Bujari që realizoi 4 pikë radhazi në sekondat e fundit që barazuan shifrat në 57-57. Por pikërisht në sekondën e fundit të ndeshjes, lojtarja Dukiç shënoi poshtë tabelës një dypikësh që i dha fitoren ekipit të Mirza Alibegajt.

Një duel derbi që fitohet për herë të dytë brenda pak ditësh, pasi e njëjta skuadër fitoi ndaj rivales së saj edhe në gjysmëfinalen e Kupës së Shqipërisë, një veprimtari, që siç dihet, e fitoi SHBF Tirana , e cila triumfoi në finale ndaj Flamurtarit. Kjo ndeshje derbi ishte një fitore e madhe për skuadrën e Alibegajt, e cila i afrohet ndjeshëm në kryesim skuadrës së SHKBF Tiranës së trajnerit Erdal Borova, tashmë me vetëm një pikë larg (20-19).

Ndeshjet e tjera të kësaj jave luhen këtë të shtunë dhe konkretisht, paradreke Flamurtari-Elbasani dhe pasdite Vllaznia-Studenti.

Kampionati Kombëtar

i Basketbollit – Femra

Kategoria e Parë

Të premten:

SHKBF Tirana – SHBF Tirana       57-59

(14-18, 16-16, 7-14, 20-11)

Të shtunën:

Flamurtari – Elbasani                       (11:00)

Vllaznia – Studenti                           (16:00)

Renditja

Nr.       Skuadra                     N.        F.         H.        Pikë

1. SHKBF Tirana          11        9            2        20
2. SHBF Tirana             11        8            3        19
3. Flamurtari                  10        7            3        17
4. Vllaznia                     10        5            5        15
5. Studenti                     10        2            8        12
6. Elbasani                    10        0          10        10