Studenti në basketboll për femra, që vazhdon të luftojë fort për një vend në 4 skuadrat e para, të cilat më pas do të luftojnë për titullin “kampion”, dje ka “zbuluar” Aida Vatën. Kjo lojtare ka shënuar 30 pikë nga 82 pikë që ka realizuar në total Studenti i trajneres Fiorentina Mitku. Thuajse gjysmën, ndërsa është e fortë në depërtimet e saj në qendër të zonës së Elbasanit, aq sa i detyron mikeshat të bëjnë dhe faulla ndaj saj. Në total janë 15 dypikësha që Vata me shumë zgjuarsi, e rrethuar në raste të veçanta dhe nga tre kundërshtare, ka ditur të kthejë në pikë çdo sulm të saj.
Vetëm kështu ka mundur Studenti të hedhë poshtë rivalitetin me Elbasanin, ndërsa nuk ka qenë në një ditë të mirë as Mema, që është lojtarja kryesore e kësaj skuadre. Për të besuar këtë, edhe pse ka shënuar plot 15 pikë, është fakti që 3-pikëshi i parë i Memës ka ardhur vetëm disa sekonda nga përfundimi i pjesës së dytë, pas së cilës ka marrë zemër dhe Metani. Në përgjithësi kjo fitore duhet cilësuar si e Vatës, sepse i tillë është ndërtuar Studenti, atje ku një lojtare merr përsipër të zgjidhë ndeshjen. Elbasani u përpoq, por pas shkëputjes në pikë të Studentit e pati të vështirë të reagoi.
Ajo që duhet parë me shqetësim për skuadrën e Mitkut është fakti që kur bllokohet Mema, e cila jo gjithmonë është në ditën e saj më të mirë, tashmë kundërshtarët e mësuan se e tillë është dhe Vata, atëherë prishet i gjithë funksioni i Studentit. Që në fakt do kohë të marrë veten dhe të gjejë ritmin e duhur për të shkuar tek fitorja. Ka vend për korrigjim, gjithnjë nëse duhet menduar se ky Student do të jetë i aftë për të shkuar në katër ekipet e para për titull. Shanset i ka sepse fillimisht luan në fushë të huaj me Apoloninë.
Më pas ka përplasjen e “brirëve” me Vllazninë, kurse sfida me Flamurtarin në Vlorë do të konsiderohet… si të jenë me humor vlonjatet. Ndërkohë, ndoshta dhe si alibi, tek Studenti kanë pasur frikë nga ardhja e gjyqtarëve Kasmi dhe Allaraj, sepse i kanë konsideruar si “të Elbasanit”. Por në fund, edhe pse shpeshherë gjatë lojës ka pasur dhe shpërthim pakënaqësish, janë ndarë të qetë dhe duke i dhënë dorën këtyre gjyqtarëve, që e mbajtën relativisht mirë ndeshjen…
Kampionati Kombëtar
i Basketbollit – Femra
Kategoria e Parë
Java e 15-të
(10-11 mars 2017)
Të premten:
Studenti – Elbasani 82-53
Të shtunën:
Skënderbeu – Vllaznia ora 13:00
Apolonia – Kamza Basket ora 16:00
Tirana – Goga Basket ora 17:00
Flamurtari pushim
Renditja
Nr. Skuadra N. F. H. Psh-Pp Pikë
- Flamurtari 13 11 2 1115-852 24
- Tirana 12 12 0 870-735 24
- Goga Basket 12 11 1 1104-650 23
- Vllaznia 13 7 6 884-839 20
- Studenti 13 7 6 874-838 20
- Elbasani 13 4 9 912-961 17
- Skënderbeu 12 4 8 756-877 16
- Apolonia 13 1 12 788-1111 14
- Kamza Basket 13 0 13 662-1196 13
