ASNN – Ndeshje dramatike, e bukur dhe me emocione, deri në sekondat e fundit, ka qenë ajo e djeshmja e luajtur në Pallatin e Sportit “Tamara Nikolla” të Korçës. Por që fatkeqësisht është njollosur nga mungesa e seriozitetit në gjykim, sidomos nga ana e gjyqtarit Erlambi Tiko. Bëhet fjalë për duelin mes Skënderbeut dhe Apolonisë, e vlefshme për javën e 13-të të Kampionatit Kombëtar në Basketboll për Femra.

10 sekonda nga fundi rezultati shënonte në 73-73. Dy gjuajtje të lira të Eda Llazarit i kanë dhënë një fitore me vlera korçareve, ndonëse ka shumë pikëpyetje sesi u arrit kjo fitore, teksa fieraket e drejtuar nga trajnerja Hermiona Çuko e kanë dominuar ndeshjen. Takimi nis mirë për mikeshat që krijojnë një diferencë pikësh dhe e mbyllin pjesën e parë me shifrat 16-21 në favorin e tyre.

Pjesa e dytë duket e barabartë, ndërsa vendaset ngarkohen shumë me personale. E pas 20 minutave të para  rezultati është 35-41 për Apoloninë. Pas pushimit janë vendaset që luajnë saktë dhe vetëm në pjesën e tretë, Llazar shënon katër trepikësha. 27-19 mbyllen 10 minutat e treta, teksa tabela elektronike shënon shifrat 62-60 për Skënderbeu.

Pjesa e fundit është edhe më dramatikja, teksa Skënderbeu ka tre lojtaret kryesore me katër personale, por falë bujarisë së Tikos dhe Muhos, kursehen nga personalet e tjera, duke mos u ndëshkuar për faulla flagrante. Mikeshat, me anë të Demirajt, vazhdojnë kryesojnë me pikë. Katër minuta nga fundi i kësaj pjese tabela shënon 73-73 dhe pas këtij momenti të dy skuadrat gabojnë.

Dhe deri në sekondat e fundit nuk shënojnë dot asnjë pikë të vetme. Kur duheshin edhe 10 sekonda lojë, Llazar nuk gabon nga personalet dhe i shënon të dyja. E sekondat e mbetura nuk mjaftojnë që Apolonia të shënojë. Përfundimisht 75-73 për Skënderbeun, e cila është ngjitur në kuotën e 15 pikëve në renditje. Por ajo që vlen të theksohet është se gjyqtari Tiko është përzgjedhur çuditërisht të gjykojë shumë shpesh Apoloninë.

Kampionati Kombëtar

i Basketbollit – Femra

Kategoria e Parë

Java e 13-të

(24-26 shkurt 2017)

Të premten:

Studenti – Tirana                 64-75

Të shtunën:

Flamurtari – Vllaznia           67-57

Elbasani – Kamza Basket  68-43

Të dielën:

Skënderbeu – Apolonia     75-73

Goga Basket                         pushim

Renditja

Nr.       Skuadra                     N.        F.         H.        Psh-Pp           Pikë

1. Flamurtari                  12        10        2          972-762         22
2. Tirana                         11        11        0          789-676         22
3. Goga Basket             11        10        1          1009-591       21
4. Vllaznia                     12          6        6          807-783         18
5. Studenti                     11          6        5          733-690         17
6. Elbasani                    12          4        8          859-879         16
7. Skënderbeu              11          4        7          697-776         15
8. Apolonia                    12          1        11        732-1044       13
9. Kamza Basket          12          0        12        572-1053       12