ASNN – Italia s’e ka të vështirë të kalojë edhe vizitën në “Asllan Rusi”, teksa ka fituar me 46 pikë dhe kryeson grupin C me 12 pikë të plota. Vajzat kuqezi, në nëntor përballë Britanisë së Madhe dhe Malit të Zi.

Siç ishte njoftuar, 200 lekë ka qenë çmimi i biletës në Pallatin e Sportit “Asllan Rusi” në kryeqytet, ndërsa shitja e tyre është bërë në hyrje të impiantit, nën kontrollin e forcave të rendit dhe të sigurisë.

Ndërkohë 300 shikues kanë qenë të pranishëm dje në “Asllan Rusi”, më së shumti dashamirës të basketbollit e specialistë të fushës, por dhe të afërm të lojtareve, apo dhe shoqëri e drejtuesve të stafit teknik kuqezi.

Në fakt, i gjithë organizimi i ndeshjes ka qenë në nivele të pranueshme ndërkombëtare dhe aparaturat elektronike kanë funksionuar normalisht. Për fat të mirë, edhe moti ka qenë pa shi dhe temperaturat brenda në “Asllan Rusi” ishin deri diku të pranueshme.