ASNN – Skuadra e trajneres Mirza Alibegaj shënon vetëm 3 pikë në një 10-minutësh, por shkaqet, të shumta dhe përtej parketit. 3 ndeshje, 3 humbje, por edhe një paraqitje që, për fatin të keq, kanë ardhur duke dëshmuar një lojë gjithnjë e më të dobët. Natyrisht, diferencat midis koshit shqiptar dhe atij rajonal, për të mos shkuar më pas më përtej, atij kontinental, janë të dukshme dhe pjesëmarrja e Kombëtares kuqezi të vajzave të grupmoshës deri në 18-vjeç, në Divizionin B të Kampionatit Evropian të Basketbollit thjesht i kanë nxjerrë ato në pah.
Shqipëria po përballet në grupin D, me Holandën, Suedinë, Luksemburgun, Ukrainën dhe Britaninë e Madhe. Ndeshjet e këtij grupi po zhvillohen në kryeqytetin e Maqedonisë Veriore, Shkup, dhe skuadra kuqezi, e drejtuar nga trajnerja Mirza Alibegaj dhe ndihmësja Anila Çobaj, ka pësuar të dielën humbjen e 3-të në po aq ndeshje që ka zhvilluar deri më tani në kuadër të këtij grupi. Dhe pasi është mundur 46-100 përballë Suedisë në takimin e parë, 74-49 përballë Luksemburgut në atë të dytin, vajzat kuqezi kanë kapitulluar me shifrat 36-89 përballë Holandës në ndeshjen e 3-të.
Në atë që ishte padyshim paraqitja më e dobët e Shqipërisë në ndeshjet e këtij grupi. Përveç numrit më të vogël të pikëve të shënuara, kjo ishte një ndeshje për t’u harruar për skuadrën e Alibegajt, edhe për paraqitjen që bëri në përgjithësi dhe mjafton të përmendim që, në 10 minuta lojë të pjesës së dytë, ka arritur të shënojnë vetëm një kosh, atë 3-pikësh pas një këmbënguljeje të gjatë të Klea Verrit.
Shqipëria e ka bërë pushim ditën e hënë, për efekt kalendari, ndërsa do të rikthehet në parket të martën për sfidën me Britaninë e Madhe dhe për ta mbyllur të mërkurën fazën e grupit me sfidën me Ukrainën. Por, përtej rezultateve, ajo që shumica e specialistëve kanë përsëritur është se, vendimtare për zhvillimin e basketbollit në Shqipëri, ku parametrat fizikë të të rinjve që luajnë janë përmirësuar ndjeshëm, është padyshim përmirësimi i infrastrukturës sportive, që, për momentin, lë shumë për të dëshiruar.
