ASNN – Kupa e Shqipërisë në basketbollin e femrave shkoi për Flamurtarin edhe për këtë vit, i 18-ti në histori.

Në një intervistë për të përditshmen sportive shqiptare, “Panorama Sport”, kapitenia e vlonjateve, Migena Plasa, analizon suksesin ndaj Goga Basket, njëherësh konfirmon objektivat e radhës.

AlbanianSport.com jua sjell në dy pjesë intervistën e veteranes vlonjate të koshit dhe sot është pjesa e parë, kurse e dyta, nesër.

– Flamurtari është rikthyer në eksperte të finaleve?

– U bënë 10 vite që ndodh e njëjta gjë. Edhe kësaj here nuk përbënte ndonjë çudi. Nuk ishte surprizë, përveçse trofeu i radhës.

– Nëse do të shohim finalen, diferencat u bënë në pjesën e parë?

– Sigurisht që krijimi i diferencës prej 20 pikësh në minutat e para na ndihmoi shumë edhe për vazhdimësinë. Ndoshta edhe pas ndërprerjes së energjisë 4 apo 5 herë gjë që ndikoi negativisht tek ekipi ynë, ne e lëshuam lojën në momente të caktuara dhe bëmë që rezultati të ngushtohej. Besoj se na dha shumë dorë diferenca e krijuar në fillim.

– Si e kishit përgatitur finalen e Kupës së Shqipërisë?

– Ne e kishim vlerësuar maksimalisht për faktin që Goga Basket kishte ndërtuar një ekip shumë të mirë dhe me vlera brenda duke bërë edhe blerje si rastin e një amerikane dhe një boshnjake. Njëherësh duke parë edhe gjysmëfinalen ndaj Tiranës ku e dominuan komplet takimin. Ndaj menduam se do të ishte një ndeshje me më shumë rivalitet në fakt sesa ndodhi. Ne nuk e vumë për asnjë moment në diskutim fitoren.

– Të dyja skuadrat ishin përforcuar në merkato në prag të kësaj finaleje, por festa ka qenë sërish e vlonjateve…

– Mendoj se në të tilla raste duhen bërë blerje të zgjuara. Nuk mund të them se skuadra e Goga Basket nuk ka bërë blerjet e duhura. Për mua lojtarja boshnjake është me vlera dhe një qendër shumë e mirë që mund të luajë shumë mirë në kampionatin shqiptar. Por nuk ndaj të njëjtin mendim për anësoren amerikane. Ky është thjesht një mendim i imi. Por sa u përket blerjeve që bëmë ne, mendoj se kemi marrë dy lojtare që na duheshin në pozicione që i kishim me të vërtetë të domosdoshme. Ne donim patjetër një lojtare që luante në pozicionin 2-3, gjithashtu bëmë edhe një përforcim tjetër që luan shumë mirë në 1-2. Kanë qenë dy rolet që ne na bënim me të vërtetë punë. Dhe këtë e tregoi më së miri rezultati. Sepse dy blerje kemi bërë ne, dy ka bërë edhe Goga Basket, por treguam që kemi vepruar ne më me zgjuarsi sesa ato.

– Në nivel personal, nuk po ndaleni në fitimin e trofeve. Siç duket, keni ende “uri” për të tjera suksese në karrierë?

– Njeriu nuk ngopet asnjëherë me gjëra të mira. Nuk mund të bëj një parashikim personal se deri kur mund të vazhdoj, pasi varet nga shumë faktorë. Por shpresoj që ta mbyll me sukses edhe këtë sezon duke fituar edhe dy trofetë e tjerë. Më pas nuk e di se çfarë mund të ndodhë. Gjithsesi unë në fund të karrierës jam dhe kjo dihet.

Vijon nesër…