Njësh me humbje, Shqipëria e femrave s’ka “derman”. Kombëtarja e basketbollit të vajzave ka dështuar dhe në ndeshjen e fundit të Eliminatoreve të Evropianit, teksa dje në mbrëmje është mundur me 42 pikë diferencë nga Britania e Madhe. Shqipëria e basketbollit të femrave është bërë njësh me humbjen, ndërsa ka pësuar dhe disfatën e gjashtë në kualifikueset e Kampionatit Evropian “Republika Çeke 2017”.
Dje është mundur nga Britania e Madhe me 42 pikë diferencë, në një ndeshje disi të mirë për nivelin e basketbollit të femrave në vendin tonë. Aq më tepër që kombëtarja dje ka qenë me mungesa. Sepse, ashtu sikurse është bërë e ditur dhe një ditë më përpara, përveç Zykajt, Llazar, Aliajt, Hoxhajt, Sokolit, Palkos, kombëtarja ka qenë e privuar dhe nga Mehmeti e Përmeti, të dyja të pamundura për shkak problemesh fizike.
E megjithatë dhe kështu, Shqipëria e basketbollit të femrave ka shënuar 55 pikë duke dhënë sinjale se në të ardhmen do të jetë shumë më mirë. Igena Qypi është vendimtare me 3-pikëshat e saj, teksa ka realizuar 4 të tilla. Po kështu dhe Xhanaj, Eliverta dhe Gera Bujari. Por duke pasur defekte në gjëra elementare, atëherë britaniket e kanë pasur më të lehtë për të fituar.
Sidomos në dy pjesët e dyta kanë pasur një “snajper” si Shantellë Hendi, e cila me 3-pikëshat, 7 të realizuar në 8 gjuajtje, ka qenë vendimtare për britaniket. 16-25 pjesa e parë, 11-22 e dyta dhe në pushim mikeshat kanë kryesuar 27-47. Nis me një 3-pikësh të Qypit e treta, ndërsa dhe Papa bën mirë pjesën e saj. Por nuk të lë Hendi. 15-21 pjesa e tretë dhe në total 42-68.
Vendimtare për britaniket ka qenë pjesa e fundit, të cilën e fituan 13-29 dhe në përfundim 55-97. Përfundimisht, në 6 ndeshje, 6 humbje, ndërsa, me një grup të hekurt përballë Italisë, Malit të Zi dhe Britanisë së Madhe, misioni i Shqipërisë ka qenë i pamundur. Ndoshta gjërat mund të jenë më ndryshe në Eliminatoret e ardhshme, por niveli i kampionatit vendës nuk të lë të shpresosh shumë…
Shqipëri – Britani e Madhe 55-97
(16-25, 11-22, 15-21, 13-29)
Shqipëria: Lalaj, G. Bujari (7), Xhanaj (12), Qypi (12), Myrto (4) / Gjoni, E. Bujari (13), Berranija, Dashja, Papa (7). Trajner: Xh. Kalaja
Britania e Madhe: Kollins (3), Uonderuoll (12), Hendi (28), Klark (16), Stjuart (9) / Xhons (5), Alen (2), Fagbenle (5), Tomson (4), Uilkinson (9), Simpson (4). Trajner: H. Bukata Fernandez
Gjyqtare: O. Jalman (Turqi), J. Smiljaniç (Serbi), M. Kavara (Bosnjë-Hercegovinë)
