ASNN – Ndryshe nga Liga Unike e femrave, që kanë shkuar mirë dhe nuk ka pasur telashe, ajo e meshkujve është një tjetër histori. Deri më tani Është zhvilluar vetëm një edicion i Ligës Unike, të cilin e ka fituar “Golden Eagle” Ylli. Edicionin e kaluar, gjithçka nisi me turneun e Superkupës Mbarëkombëtares, por, pas javëve të para të ligës, turneu u ndal për shkak të pakënaqësive të ekipeve nga Shqipëria ndaj Federatës

Kështu liga u ndërpre, ndonëse ajo ishte prezantuar me shumë bujë dhe kostoja financiare nuk ishte e vogël. Liga Unike do të zhvillohet edhe te meshkujt, por në formë turneu. Do të luhet një “8-she Finale”, me 4 skuadrat më të mira nga Kosova dhe Shqipëria të edicionit të kaluar. Ky turne do të mbahet në fund të muajit mars në qytetin e Vlorës.

Turneu pritet të zgjasë një javë dhe do të zhvillohet me sistem grumbullimi. Marrëveshja për vazhdimin e Ligës Unike është arritur në fillim të muajit dhjetor, pas takimit që krerët e Federatës së Basketbollit të Kosovës e patën me ata të Federatës Shqiptare të Basketbollit. Mbetet për t’u parë sesi do të vijojë të organizohet sezonin e ardhshëm ky turne mbarëkombëtar.