Goga Basket e ka shpërfytyruar Tiranën në basketboll për femra në Sallën Sportive “Fahrie Hoti”, ndërsa ka fituar me 15 pikë diferencë, aq sa për të marrë kreun në renditjen e kampionatit. Kjo dhe duke përfituar nga pushimi i Flamurtarit në javën e 15-të. Skuadra e trajnerit Henri Moja mbështetur fort tek Lalaj, Qypi, Alagiçi, MekRoi, Mehmeti e S. Omerbashiçi jo vetëm që ka qenë e saktë në gjuajtjet e veta, por e ka nxjerrë krejtësisht jashtë loje Tiranën.

Një Tiranë që, jo vetëm që ka qenë në ditën më të errët të saj, por ka treguar se e ka të vështirë të jetë skuadër, sidomos kur bëhej fjalë për ndeshje të rëndësishme. E thënë ndryshe, Tirana e trajnerit Roland Avrami kishte vetëm këto dy ndeshje të rëndësishme për të luajtur dhe për të konfirmuar kryesimin e vet. Pra fillimisht me Goga Basketin dhe më pas me Flamurtarin. Por duket se nuk është e tillë për të rivalizuar për titullin “kampion”.

Sepse, me përjashtim të Jankoviçit, e cila është bërë shtysë për të tjera me depërtimet e saj në thellësi të zonës së Goga Basketit, madje dhe duke qenë shënuesja më e mirë, të gjitha të tjerat janë jashtë loje. Tek-tuk ndonjë 3-pikësh, por mënyra e pasimeve, shumë pak qarkullim topi, asnjëherë me dëshirën për të bërë gjërat mirë tregon se Tirana ka probleme. Emrat nuk i mungojnë, por duket se ekipit i është prishur ritmi i sezonit të kaluar.

Sigurisht që nxjerra jashtë loje e Tiranës është meritë e Goga Basket, sepse me udhëzimet e trajnerit Moja është bërë “grusht” si ekip, atje ku nuk ka përbuzje, apo pakënaqësi mes shqiptareve dhe të huaja. Por të gjithë janë bashkë. Tirana është ankuar për gjyqtarët, por në tërësinë e vet nuk ka pse gjen alibi tek bilbilat e Gokës dhe Trajerit, të cilët kanë gjykuar përgjithësisht mirë. Sepse ka luajtur ndeshjen më të dobët të sezonit.

Kampionati Kombëtar

i Basketbollit – Femra

Java e 15-të

(10-11 mars 2017)

Të premten:

Studenti – Elbasani                         82-53

Të shtunën:

Skënderbeu – Vllaznia                   75-65

Apolonia – Kamza Basket              85-62

Tirana – Goga Basket                     71-86

Flamurtari                                          pushim

Renditja

Nr.       Skuadra                     N.        F.         H.        Psh-Pp           Pikë

1. Goga Basket             13        12          1        1190-721       25
2. Tirana                         13        12          1          941-821       25
3. Flamurtari                  13        11          2        1115-852       24
4. Vllaznia                     14          7          7          949-914       21
5. Studenti                     13          7          6          874-838       20
6.        Elbasani                    13          4          9          912-961       17
7. Skënderbeu              13          5          8          831-942       18
8. Apolonia                    14          2        12          873-1173     16
9. Kamza Basket          14          0        14          724-1281     14