Endrit Hysenagolli është përforcimi i radhës për Tiranën në basketboll për meshkuj, e cila është duke u përgatitur seriozisht për pjesëmarrjen e saj në Ligën Ballkanike. Menaxheri i përgjithshëm i klubit shumësportësh bardheblu, Anxhelo Koleka, ka përfunduar gjithçka dje në mbrëmje dhe marrëveshja me Hysenagollin është quajtur e kryer me një shtrëngim duarsh.
Hysenagolli, i datëlindjes 5 korrik 1988, 2.10 metra i gjatë, ka qenë pjesë e Tiranës me të rriturit. Më pas deri në fund të sezonit 2012-2013 ishte tek Kamza Basket dhe në të gjithë këtë periudhë ka qenë pjesë e skuadrave kosovare. Fillimisht tek Peja e më pas dhe tek Bashkimi i Prizrenit. Përvoja e tij e grumbulluar në ekipin përfaqësues, por dhe në klubet kosovare, do ta ndihmojë Tiranën të bëjë më të mirën.
Ndërkohë me punën e mirë që po bën menaxheri i përgjithshëm i bardhebluve, Anxhelo Koleka, si dhe menaxheri i skuadrës, Melzin Lazimi, tek Tirana më parë kanë ardhur trajneri maqedonas Sllobodan Petrovski. Po kështu lojtarët Luka Petroviç e Manuel Xhonson, por dhe Erkand Karaj. Tirana të shtunën do të luajë ndeshjen e parë miqësore në Ulqin me SIGAL Prishtinën.
Kjo e fundit është fituese në fuqi e Ligës Ballkanike për sezonin 2015-2016. Tirana do të jetë ekipi që do të hap Ligën Ballkanike për këtë sezon në ndeshjen e 10 tetorit në “Asllan Rusi” me Trepçën e Mitrovicën.
